नक्सा देखाएर बालेनले भने : पी ए आर के आई एन जी… पार्किङ

९ भदौ, काठमाडौं । काठमाडौं महानगरले बुधबार विहान सार्वजनिक रुपमा भनेको थियो -आज बानेश्वरको ‘अल्फा हाउस’मा पनि अनुगमन हुनेछ ।

‘अल्फा हाउस’ले आफ्नो बेसमेन्ट व्यावसायिक प्रयोजनमा लगाएर विभिन्न सेवाका लागि भवनमा आउनेहरुलाई सडक र पेटीमा पार्किङ गराइरहेको जानकारी महानगरलाई थियो ।

मेयर बालेन साह नक्सा विपरीतका संरचनाहरु हटाउन आग्रह गर्दै बुधबार विहान शंखमूलबाट अल्फा हाउस पुग्दा भवन मालिक द्विराज शर्मा शिवाकोटी कुरा गर्न आए । कुराकानीको क्रममा मेयरले नक्सा मागेपछि विवाद भयो ।

भवनको नक्सामा पार्किङ नभएको शिवाकोटीको दावी मान्न तयार नभएका मेयरले नक्सा देखाउन भने । नक्सा ‘महानगरसँगै हुने’ जवाफ पाएपछि उनले सोधे, ‘तपाईंको घरको नक्सा मसँग हुन्छ कि तपाईंसँग ?’

यो पनि पढ्नुहोस

बालेनले जंगिएर सोधे : घरको नक्सा मसँग हुन्छ कि तपाईसँग ?

बालेन आक्रोशित भएपछि शिवाकोटीले नक्सा लिएर कानुन व्यवसायीसहित महानगरमै आउने बताए ।

बालेनले नक्सा पासबिना बनेको टहरामा चलिरहेको ‘अल्फा केयर फार्मेसी’को औषधि पसलमा तुरुन्तै ताल्चा लगाउन नगरप्रहरीलाई निर्देशन दिएर त्यहाँबाट हिंडे ।

बालेन हिंडेपछि शिवाकोटीले सञ्चारमाध्यमसँगको कुराकानीमा ‘मेयर हुन् कि डन’ भन्दै प्रश्न गरे । अवैध संरचना नै भए पनि कानुन अनुसार हटाउनुपर्ने उनको तर्क थियो ।

बानेश्वरबाट महानगर पर्किएका बालेनले भवन निर्माण इजाजत विभागलाई अल्फा हाउसको नक्सा खोज्न लगाए । विभागले नक्साको फाइल निकालेर उनलाई निष्कर्ष सुनायो, ‘त्यहाँ भूमिगत पार्किङ छ ।’

महानगरपालिकाका भवन निर्माण इजाजत विभागका प्रमुख सुरज शाक्य अल्फा हाउसले अवैध संरचना बनाएर प्रयोजन विपरीत पार्किङ प्रयोग गरिरहेको भेटिएको बताउँछन् । ‘त्यसैका आधारमा मेयर साहेबले कारबाही अघि बढाउनुभयो,’ उनले भने ।

बिहीबार दिउँसो ३ बजे महानगर प्रहारी, नेपाल प्रहरी र ट्राफिक प्रहरीको टोलीको नेतृत्व गरेर मेयर साह अल्फा हाउस पुगे । टोलीमा उपत्यका ट्राफिक प्रहरी कार्यालयकी प्रमुख नायव प्रहरी महानिरीक्षक मिरा चौधरी पनि थिइन् ।

यसपटक बालेन अल्फा हाउसको स्वीकृत नक्सा र त्यससम्बद्ध फाइल बोकेर आएका थिए । सँगै थियो डोजर पनि । बालेनले घरधनीलाई बोलाए, तर कोही आएनन् । त्यसपछि अल्फा हाउसको मूल ढोकाबाट पसेर भूमिगत पार्किङभित्र चलाइएको ‘मेडिकल सेन्टर’का सञ्चालकलाई बाहिर बोलाए ।

त्यसपछि शिवाकोटीका प्रतिनिधिहरु पनि आए । बालेनले नक्सा निकालेर अन्डरग्राउन्ड पार्किङ देखाउँदै सोधे, ‘यो के हो ?’

उनले नक्सामा लेखिएको ‘पार्किङ’ देखाउँदै त्यहाँ उपस्थित पत्रकारहरुलाई पनि भने, ‘पी ए आर के आई एन जी, देख्नु भयो नि ? नक्सामा पार्किङ छ, खिच्नुस् ।’

त्यसपछि बालेनले भूमिगत पार्किङमा चलाइएको मेडिकल सेन्टर हटाउन भने । र, अल्फा हाउसको मूल ढोकासँगै नक्सा विपरीत बनेको टहरामा राखिएको औषधि पसलमा डोजर चलाइहाल्ने जानकारी दिए ।

सुरुमा अल्फाका प्रतिनिधिले २ दिनको समय मागे । बालेनले मानेनन् । उनीहरुले ‘एक दिनमै हटाउँछौं’ भने । तैपनि बालेन डेग चलेनन् ।

यो पनि पढ्नुहोस

नक्सा देखाएँ, डोजर चलाएँ, मैले के बिराएँ : बालेन

तत्कालै डोजर चल्ने देखेपछि सिवाकोटीका प्रतिनिधिहरुले ‘थप कागज आउँदै छ’ भन्दै तर्साउन खोजे । यसअघि यसैगरी समय दिंदा नर्भिक अस्पतालले अदालतबाट अन्तरिम आदेश लिएर आएको थियो । बालेनले तुरुन्तै डोजर चलाउने आदेश नगर प्रहरीलाई दिए ।

डोजर अघि बढेपछि पसल सञ्चालकहरुले औषधि र समान निकाल्न समय मागे । नगर प्रहरीले तुरुन्तै सामान हटाउन भन्दै ताल्चा खोलिदियो । केही मिनटमै ¥याकका औषधिहरु बोरा र कार्टुनहरुमा कोचिए ।

सिसाका ढोका खोल्ने काम चलिरहेका बेला अल्फाका आक्रोशित प्रतिनिधिहरुले मेयर साहले कानुन मिचेको, डनगिरी गरेको अरोप लगाए ।

त्यो सुनेपछि बालेनले नगरप्रहरीलाई डोजर चलाउन थप समय नकुर्न आदेश दिए । डोजरले औषधि पसल चलाइएको टहरा केही मिनेटमै भताभुंग पारिदियो ।

डोजर चल्दा अल्फाका प्रतिनिधिहरु चिच्याइरहे । तर, उनीहरुको चिच्याहट बिलाउने गरी भिडमा नारा लाग्यो– ‘बालेन दाइ, हाइ हाइ !’

त्यो दृश्य हेर्न भेला भएको समुहले मोबाइलमा फोटो/भिडियो खिच्दै अझ उच्च स्वरमा नारा लगाए, नारा लाग्यो– ‘बालेन दाइ, हाइ हाइ !’

नाराबाजीकैबीच बालेन त्यहाँबाट बाटो लाग्दा अल्फाका प्रतिनिधिहरु टहरा भत्काउँदा नफुटेका सिसा तानिरहेका थिए ।

अल्फा हाउसमा डोजर चलिरहँदा शिवाकोटीले पार्किङस्थलको वैधानिकता/व्यावहारिकता पुष्टि गर्न समय पाउनुपर्ने भनेर सामाजिक सञ्जालमा लेखिरहेका थिए ।

उनले फेसबुकमा लेखेका छन्, ‘मेयर बालेनलाई अनुरोध गर्छौं, अराजकता सिर्जना नगरौं । हामी यो देशको जिम्मेवार नागरिक हौं र कहिले पनि देशको कानून उल्लङ्घन गर्दैनौं ।’

तर, पार्किङको सवालमा अल्फा हाउसमा भाडामा बसेकाहरुको पनि चित्त बुझेको रहेनछ । त्यहाँ व्यवसाय गरिरहेका एक व्यवसायीका अनुसार अल्फा हाउसले अन्डरग्राउन्डमा अल्फा केयर चलाउन संरचना बनाइरहेको छ । यसअघि त्यहाँ खोलिएको क्याफे नचलेपछि अल्फा केयर बनाउन लागिरहेछ ।

‘अन्डरग्राउन्डमा पसल भएपछि हाम्रा ग्राहकले पेटीमै सशुल्क पार्किङ गर्नुपरेको छ,’ उनले भने, ‘अब पार्किङ खुल्यो भने सजिलो होला ।’

यो पनि पढ्नुहोस

बालेनले अल्फाबिटाको अवैध संरचनामा यसरी चलाए डोजर (फोटो फिचर)