वीरगञ्जमा मोटरसाइकल दुर्घटनामा युवकको मृत्यु

८ कात्तिक, वीरगञ्ज । पर्सामा मंगलबार बिहान भएको सवारी एक युवकको मृत्यु भएको छ ।

मंगलबार बिहान साढे २ बजे वीरगञ्ज–८ पानीट्याङकी स्थित सडकमा ना ४६ प ३२९७ नम्बरको मोटरसाइकल अनियन्त्रित भएर पल्टिँदा चालक सोलुखुम्बुको नेचा सल्यान गाउँपालिका–२ स्थायी घर भई वीरगञ्ज – ८ मा डेरा गरी बस्ने १९ वर्षीय अनुप राईको मृत्यु भएको हो ।

प्रहरीका अनुसार मोटरसाइकल अनियन्त्रित भई सडक किनारमा रहेको बिजुलीको पोलमा ठोक्किएर राई गम्भीर घाइते भएका थिए ।

टाउको र खुट्टामा गम्भीर चोट लागेको अवस्थामा उनलाई नेशनल मेडिकल कलेजमा उपचारका लागि लगिएको थियो । अस्पतालमा उपचारको क्रममा बिहान ४ बजे चिकित्सकले उनलाई मृत घोषित गरेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दीपक गिरीले जानकारी दिए ।

मोटरसाइकल तीव्र गतिमा गुडाएका कारण दुर्घटना भएको प्रारम्भिक अनुसन्धानबाट खुलेको उनले बताए ।