इलोन मस्कलाई पछि पार्दै बर्नार्ड अर्नाल्ट बने सर्वाधिक धनाढ्य

२२ मंसिर, काठमाडौं । इलोन मस्कको संसारको सबैभन्दा धनाढ्य व्यक्तिको ताज खोसिएको छ । फोर्ब्सको रियल-टाइम धनाढ्यहरूको सूचीअनुसार उनी दोस्रो स्थानमा झरेका छन्  र
उनको स्थानमा ७३ वर्षीय  फ्रान्सेली अर्बपति बर्नार्ड अर्नाल्ट आएका छन् ।

अर्नाल्ट लक्जरी ब्रान्ड लुइस भिटनको मूल कम्पनी एलभीएमएचका मालिक हुन् ।  फोर्ब्सको रियल टाइम इन्डेक्सका अनुसार यो समाचार तयार पार्दासम्म लागि बर्नार्ड अर्नाल्टको कुल सम्पत्ति १८६.३ बिलियन डलर र टि्वटरका नयाँ मालिक एलोन मस्कको कुल सम्पत्ति १८५.४ बिलियनमा झरेको थियो ।

इलेक्ट्रिक कार कम्पनी टेस्लामा मस्कको सेयरको मूल्यमा तीव्र गिरावट आएको छ । सामाजिक सञ्जाल प्लेटर्फम ट्वीटर ४४ अर्ब डलरमा किनेपछि पनि मस्कको सम्पत्तिमा कमी आएको हो । टेस्ला मालिक मस्क सेप्टेम्बर २०२१ देखि शीर्ष स्थानमा छन् । त्यसपछि मस्क दोस्रो स्थानमा झरेको यो पहिलो पटक हो ।

भारतका गौतम अडानी धनीको वरियतामा तेस्रो स्थानमा छन् । अडानी समूहका प्रमुख गौतम अडानीको कुल सम्पत्ति १३४.८ बिलियन डलर छ । योसँगै अमेजनका संस्थापक जेफ बेजोस चौथो स्थानमा छन्, उनी १११.८ बिलियन डलरको मालिक हुन् ।

भारतको रिलायन्स इन्डस्टि्रजका अध्यक्ष मुकेश अम्बानी विश्वका धनी अर्बपतिको सूचीमा आठौं स्थानमा छन् । अम्बानीको कुल सम्पत्ति ९३.३ बिलियन डलर छ ।