बार्सिलोना कोपा डेल रे को सेमिफाइनलमा

१२ माघ, काठमाडौं । बार्सिलोना स्पानिस कोपा डेल रे फुटबलको सेमिफाइनलमा प्रवेश गरेको छ ।

ओसमान डेम्बेलाको निर्णायक गोलमा बुधबार राति बार्सिलोनाले रियल सोसिडाडलाई १–० ले पराजित गर्दै सेमिफाइनलमा प्रवेश गरेको छ ।

बार्सिलोनालाई जिताउन फ्रेन्च फरवार्ड डेम्बेलेले खेलको ५२औं मिनेटमा गोल गरे ।

त्यसअघि पहिलो हाफको अन्त्तयतिर ब्राइज मेन्डेजले रातो कार्ड पाएपछि सोसिडाड दश खेलाडीमा समेटिएको थियो ।

यस सिजन उत्कृष्ट लयमा रहेको बार्सिलोना ला लिगाको शीर्ष स्थानमा छ भने २०२३ को सुरुमै रियल मड्रिडलाई हराएर स्पानिस सुपर कपको उपाधि जितिसकेको छ ।

यस्तै अर्को खेलमा सेभियालाई अतिरिक्त समयमा २-१ ले पराजित गर्दै ओसासुना पनि कोपा डेल रे को सेमिफाइनलमा प्रवेश गरेको छ ।

घरेलु मैदानमा एजेक्वेएल एखिभालले ७१औं मिनेटमा गोल गर्दै ओसासुनालाई अग्रता दिलाएका थिए । तर युसु एन नेस्रीले इन्जुरी टाइममा गोल गर्दै खेल बराबरीमा पुर्‍याए ।

बार्सिलोनाबाट लोनमा गएका विंगर अब्डे एज्जालजोउलीले ९९औं मिनेटमा निर्णायक गोल गर्दै ओसासुनालाई जिताए ।