महोत्तरीमा जलेर घाइते भएकी महिलाको मृत्यु

१ चैत, जनकपुरधाम । महोत्तरीमा आगलागीमा परेर गम्भीर घाइते एकजनाको मृत्यु भएको छ । महोत्तरीकै बलवा नगरपालिका–४ परौलकी ५० वर्षीय चन्दर देवी यादवको मृत्यु भएको प्रहरीले जनाएको छ ।

गत फागुन २७ गते घरमा आगलागी हुँदा गम्भीर घाइते भएकी उनलाई उपचारको लागि प्रादेशिक अस्पताल जनकपुरमा भर्ना गरिएको थियो । उपचारको क्रममा उनको बुधबार दिउँसो मृत्यु भएको जिल्ला प्रहरी कार्यालय महोत्तरीका सूचना अधिकारी सरोज राईले जानकारी दिए ।

परौल बस्ने रामसागर यादवको खपडाको छानो, बाँसको टाटीको बेरा लगाएको १ तले कच्ची भान्सा घरमा फागुन २७ गते दिउँसो आगलागी भएको थियो । आगोमा जलेका ५२ वर्षीय जयकरण यादवको उपचार भने काठमाडौंमा भइरहेको प्रहरीले जनाएको छ ।