जब मिटरब्याज पीडितले सांसदको नाम लिइन्…

१५ चैत, काठमाडौं । सिरहाको अर्नामा गाउँपालिका-१ कि रामवती सिंह १२ दिन पैदल हिँडेर न्याय माग्न बर्दिबासबाट काठमाडौं आउने मिटरब्याज पीडित टोलीकी सदस्य हुन् । मिटर ब्याजीले आफ्नो जमिन खाइदिएको भन्दै संघीय सरकारसँग न्याय माग्न आएकी उनलाई १२ चैतमा मातातीर्थमा पत्रकारहरुले भेटेर अन्तर्वार्ता लिए ।

१२ गते साँझ सिंहले दिएको एक भिडियो अन्तर्वार्तामा आफ्नो जग्गा हडप्ने मिटरब्याजी मधेश प्रदेशसभा सदस्य त्रिभुवन साह रहेको खुलाएकी थिइन् । १३ चैतको बिहानै उनीहरु बास बसेको मातातीर्थस्थित टहरोमा दुई जना नचिनेका मानिसहरु पुगे । ती मानिसहरुले सिंहलाई आन्दोलन छाडेर घर जान आग्रह गरे ।

‘१२ दिन हिँडेर आएँ, अब न्याय पाएपछि मात्र फर्किन्छु, म घर जान्न’ सिंहले ती मानिसहरुलाई भनेको सुन्ने उनका एक साथीले अनलाइनखबरसँग भने, ‘सिंह उनीहरुको कुरा नसुनी १३ औं दिन पनि पैदलयात्रामा सहभागी भएर खुलामञ्चतर्फ अघि बढिन् । तर कंलकी आउँदासम्म उनलाई ती व्यक्तिहरुले पछ्याउन छाडेनन्, घर फर्किन निकै कर गरे ।

संघर्ष समितिको संयोजन गरिरहेका अभियन्ता सन्तोष दाहालका अनुसार नातामा नाति पर्ने एक जना र सांसद साहका आफन्त बताउने मानिसले कुरा मिलेको भन्दै सिंहलाई घर फर्कन मरिहत्ते गरे ।

१३ गते साँझ खुल्लामञ्चमा महानगर प्रहरीसँग अन्य मिटरब्याज पीडितहरु संघर्ष गरिरहँदा दुई जना युवा भने सिंहलाई घर फर्काउन कर गरिरहेका संघर्ष समितिका संयोजक मनोज पासवानले बताए ।

त्यसको भोलिपल्ट मंगलबार बिहानै सिंहले आफू आन्दोलनमा सहभागी नहुने संघर्ष समितिलाई जानकारी गराइन् ।

संयोजक पासवानले सोधे- किन ?

‘मेरो काम सल्टियो, जग्गा फिर्ता हुने भयो म आजै घर जान्छु मलाई घरबाट बोलावट भएको छ’ सिंहले भनेको पासवानले सम्झिए ।

पासवानले फेरि प्रश्न गरे- कसरी ?

‘धेरै कुरा थाहा छैन मेरो समस्या सल्टियो, मेरो जग्गा फिर्ता आउने भयो’, रामवतीले जवाफ दिइन् । यसपछि सिंह घर जान्छु भन्दै आन्दोलनबाट छुट्टिइन् । मंगलबार बिहानैदेखि मिटरब्याज पीडितहरु प्रधानमन्त्रीको सरकारी निवास बालुवाटार जाने बाटो टंगालमा धर्नामा बसे, त्यसपछि भद्रकाली हुँदै माइतीघर र बानेश्वरमा उनीहरु न्याय माग्दै प्रर्दशनमा उत्रिए तर त्यहाँ १३ दिन सँगै हिंडेर आएकी सिंह थिइनन् ।

यसबारे संघर्ष समितिले बुझ्दै जाँदा खुल्यो बर्दिबासबाट हिंडेको १२ औं दिनमा उनले धेरै पत्रकारका सामुन्नेमा आफ्नो साहुबारे बोलेकी थिइन् । एक टेलिभिजनबाट प्रशारण भएको भिडियोमा सिंहले आफूलाई मिटरब्याजमा ऋण दिने व्यक्ति सिरहा–४ (१) बाट मधेश प्रदेशसभामा निर्वाचित प्रदेशसभा सदस्य त्रिभुवन साह भएको खुलाएकी थिइन् ।

साहले ४ मंसिरको प्रदेशसभा सदस्य चुनावमा  जनमत पार्टीबाट चुनाव जितेका थिए । टेलिभिजनमा आफ्नो नाम लिएर मिटरब्याजी भनेपछि सांसद साहले सिंहको आफन्त र आफ्नो मान्छे लगाएर सिंहलाई आन्दोलनबाट फिर्ता बोलाएको संघर्ष समितिको अरोप छ ।

वर्षौंसम्म नसल्टिएको समस्यामा सल्टाउन एक्कासी सांसद साह तयार हुनु शंकास्पद भएको संघर्ष समितिको व्यवस्थापन तथा संयोजन गरिरहेका सन्तोष दाहाल बताउँछन् । ‘सांसद साहले आफ्नो बदनाम लुकाउन यस्तो हर्कत गरेका हुन् उनको (रामवती सिंह) सुरक्षाको जिम्मा कसले लिन्छ ?’ दाहालले प्रश्न गरे ।

अनलाइनखबरसँगको कुराकानीमा प्रदेशसभा सदस्य साहले आफू र रामवतीबीचको समस्या समाधान भएको बताए । ३ लाख रुपैयाँ तिर्न नसकेको भन्दै सांसद साहले रामवतीको जग्गा हडपेका थिए । उक्त जग्गा फिर्ता गराउन रामवतीले जिल्ला अदालत सिरहामा निवेदन दिएकी थिइन् । तर उक्त निवेदनमाथि कारबाही भएको थिएन । मंगलबार भने रामवतीले जग्गा फिर्ता पाएकी सांसद साहले बताए ।

‘मैलै दिदीसँग मागेर रामवतीलाई नातिनीको बिहेमा गर्जो टार्न तीन लाख रुपैयाँ दिएको थिएँ, तर यसको दुरुपयोग गरेर मेरो बेइज्जत गरियो’, सांसद साहले भने, ‘उहाँ र म बीचमा केही लेनदेन थियो तर यसलाई हिजै अदालत गएर माफी मिनाहा गरिदिएको छु, लोकतन्त्रमा कसैले कसैलाई झुक्याउन ढाँट्न सक्दैन नि ।’