सावित्राको दुई गोलमा गोकुला केरलाको लगातार तेस्रो जित

१९ वैशाख, काठमाडौं । नेपाली राष्ट्रिय महिला फुटबल टिमकी गोल मेसिन सावित्रा भण्डारीले भारतमा जारी इन्डियन महिला लिगमा उत्कृष्ट प्रदर्शन कायम राख्दै लगातार तेस्रो खेलमा गोल गरेकी छन् ।

सावित्राको दुई गोल मद्दतमा गोकुलम केरलाले मंगलबार होप्स फुटबल क्लबलाई ३-० ले पराजित गर्दै लगातार तेस्रो जित हात पारेको हो ।

सावित्राले दुवै गोल दोस्रो हाफमा गरेकी थिइन् । असेम रोजा देवीले ३८औं मिनेटमा गोल गर्दै गोकुलम केरलालाई अग्रता दिलाएकी थिइन् ।

त्यसपछि सावित्राले ४९औं र ६३औं मिनेटमा गोल गरी टिमको जित पक्का गरिन् । सावित्राले यसअघि दुवै खेलमा ह्याट्रिक गरेकी थिइन् ।

पहिलो खेलमा इस्ट बंगला विरुद्ध ५ गोल गरेकी सावित्राले दोस्रो ओडिसा स्पोर्ट्स विरुद्ध ४ गोल गरेकी थिइन् ।

तीन खेलमा ११ गोल गरेकी सावित्रा सर्वाधिक गोल गर्नेमा शीर्ष स्थानमा छन् ।

तीन खेलमा शतप्रतिशत जितपछि गोकुलम केरालाको ९ अंक भएको छ । समूह ए मै यसअघि लगातार दुई खेल जितेको मुम्बई नाइट्सले तेस्रो खेलमा मिसाका युजाइटेडसँग गोलरहित बराबरी खेलेको छ ।

यस्तै नेपालकी गोलकिपर कप्तान एन्जिला तुम्बापो सुब्बा सम्मिलित सेथु एफसीले समूह्य बी मा लगातार दुई खेल जित्दै ६ अंक जोडेको छ ।