+
+

५ दिनपछि उठाइएको पोखराको फोहोर कहाँ फालियो ?

अनलाइनखबर अनलाइनखबर
२०८० साउन १४ गते १२:१८

१४ साउन, पोखरा । स्थानीयको अवरोधका कारण ५ दिनदेखि नउठेको पोखरा महानगरको फोहोरमैला आइतबारदेखि उठाउन थालिएको छ ।

शनिबार राति परेको भारी वर्षाले फोहोर सडकभरि छरपष्ट बनाएको थियो । सामाजिक सञ्जालमा व्यापक विरोध भएपछि आइतबार बिहानैदेखि डोजरको सहयोगमा मुख्य बजार क्षेत्रका फोहोर उठाइएको छ । तर, ल्यान्डफिल साइट क्षेत्रका स्थानीयको अवरोध जारी रहेकाले संकलित फोहोर त्यहाँ नलगेर हाललाई गाडीमै राखिएको महानगरले जनाएको छ ।

स्थानीयसँग अझै वार्ता नमिलेकाले फोहोर संकलन गरेर गाडीमै राखिएको महानगर सरसफाइ शाखा प्रमुख कल्पना बरालले जानकारी दिइन् । ‘सडकका फोहोर आजैदेखि उठाउन सुरु भयो । तर, त्यो गाडी लामेआहाल पुगेको छैन,’ उनले भनिन्, ‘सबै फोहोर उठिसकेको छैन । केही मुख्य क्षेत्रको सडकमा फालेको फोहोरमात्रै उठाइएको हो ।’

शाखा प्रमुख बरालका अनुुसार आइतबार पोखराका न्युरोड, नयाँबजार, पृथ्वीचोक, चिप्लेढुंगालगायत मुख्य बजार क्षेत्रका सडकमा थुप्रिएका फोहोरमात्रै उठाइएको हो । आइतबार बिहान ४ गाडी फोहोर संकलन गरिएको छ ।

संकलित फोहोर अस्थायी ल्यान्डफिल साइटमा कहिले व्यवस्थापन गरिन्छ भन्ने अझै टुंगो नलागिसकेको महानगरले जनाएको छ । असन्तुष्ट स्थानीयसँग छलफल जारी रहेकाले फोहोर लामेआहाल पुग्न अझै केही दिन लाग्ने महानगरको भनाइ छ । ‘फोहोर लामेआहाल पुर्याउन हामी प्रक्रियामै छौं, समन्वय गरिराखेका छौं, टुंगिएको छैन,’ बरालले भनिन् ।

६ महिनाका लागि अस्थायी रुपमा फोहोर फाल्ने, फोहोर बिसर्जन गरिसकेपछि माटोले पुर्नेलगायत सहमति भए पनि लागू नभएको भन्दै स्थानीयले बुधबारबाट फोहोर फाल्न रोक लगाएका छन् ।

पोखरा महानगरले पोखरा महानगरपालिका वडा नम्बर ३२, लामेआहालमा भएको अस्थायी ल्यान्डफिल साइट बनाएर फोहोर व्यवस्थापन गर्दै आएको छ । पोखरा महानगर सरसफाइ शाखाका अनुसार महानगरले दैनिक दुई सय टन फोहोर व्यवस्थापन गर्दै आएको थियो ।

महानगरले यसअघि पोखरा–१४, बच्छीबडुवामा फोहोर फाल्दै आएको थियो । तर, पोखरा अन्तर्राष्ट्रिय विमानस्थल सञ्चालनमा आउने भएसँगै लामेआहालमा अस्थायी ल्यान्डफिल साइट तोकेर ६ महिना अघिबाट फोहोर फाल्न सुरु गरिएको हो ।

ल्यान्डफिल साइटमा उड्ने चराचुरुंगीका कारण विमान दुर्घटनाको जोखिम हुनसक्ने भएकाले ल्यान्डफिल साइट स्थानान्तरण गरिएको थियो ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?