सहज कर्जा प्रवाहले सेयर, घरजग्गा र क्रिप्टोमा लगानी हुँदा समस्या आयो : अर्थमन्त्री

१९ मंसिर, काठमाडौं । अर्थमन्त्री डा. प्रकाशशरण महतले विगतमा सहज रुपम कर्जा प्रवाह भएको र त्यसको सही सदुपयोग नहुँदा अहिले निजी क्षेत्रमा समस्या परेको बताएका छन् ।

चितवनको भरतपुर विमानस्थलमा मंगलबार बिहान पत्रकारसँग कुरा गर्दै अर्थमन्त्री डा. महतले विगतमा सहज रुपमा कर्जा प्रवाह भएको र सहज कर्जा प्रवाह हुँदा जग्गा, सेयर र क्रिप्टोमा पनि गयो भन्ने आएको र त्यसको अध्ययन भइरहेको बताए ।

ती क्षेत्रले ग्रहण गर्नसक्ने भन्दा बढी कर्जा प्रवाह हुँदा अहिले त्यसको प्रतिफल नआएको र जसले गर्दा हिजो ऋण लिएकाहरुले अहिले कर्जा तिर्न नसकेको अर्थमन्त्री महतले बताए ।

‘ऋण लिनेहरु समस्यामा छन् । समस्यामा भएकोले सबै बिग्रियो भन्नु स्वभाविक नै हो । अहिले घरजग्गाको कारोबार पनि पिकअप गर्दै छ,’ अर्थमन्त्री महतले भने, ‘ठिक ठाउँमा लगानी गर्दा पनि परिणाम आउन नसकेर अप्ठेरोमा परेकालाई ब्याज तिर्न समय थप गरेर राहत दिन कोसिस सरकारको तर्फबाट हुन्छ ।’

उनले अहिले समग्रमा बाह्य क्षेत्र राम्रो रहेको बताए । ‘रेमिट्यान्स ३० प्रतिशतले बढेको छ । पर्यटन पनि बढीरहेको छ । यी सबै कारणले आर्थिक गतिविधि बढ्छ,’ उनले भने, ‘आर्थिक गतिविधिमा सुधार हुन लागेको छ । केही धैर्यता गर्नुपर्छ । ऋण लिनेहरुको केही समस्या छ । त्यसको पनि विस्तारै समाधान निस्कन्छ ।’