एमाले सांसदलाई ओलीको निर्देशन : सरकारको आलोचना नगर्नुस्

२९ फागुन, काठमाडौं । नेकपा एमालेका अध्यक्ष केपी शर्मा ओलीले सार्वजनिक रुपमा सरकारको आलोचना नगर्न पार्टीका सांसदहरुलाई निर्देशन दिएका छन् । मन्त्रीहरुको कामकारबाही सन्तोषजनक नभए आन्तरिक रुपमा छलफल गरेर सुधार्न सकिने उनले बताए ।

मंगलबार बसेको एमाले संसदीय दलको बैठकलाई सम्बोधन गर्दै ओलीले भने, ‘सरकारको आलोचनामा बोल्ने होइन । सरकारको कुनै आलोचना गर्नुपर्‍यो भने आन्तरिक रुपमा गर्दा हुन्छ । किनभने कहिले कहिले देख्दा एकचिज हुन्छ, (वास्तविकतामा) अर्को हुन्छ ।’

तराईतिर डोरीको त्यान्द्रो देख्यो भने सर्प भनेर तर्सिने गरेको भन्दै उनले अगाडि भने, ‘सजग हुनुपर्थ्यो, झस्किएको ठीक छ । तर त्यतिबेला सर्प भन्यो भने पनि एकछिन पनि नहुनसक्छ । त्यसैले प्याट्ट बोलिहाल्दा कहिले कहिले नराम्रो हुन्छ ।’

कुनै मन्त्रालयको काम सन्तोषजनक नभए छलफल गर्न सकिने ओलीले बताए । ‘त्यसलाई सन्तोषजक, प्रशंसायोग्य बनाउने काममा हाम्रो योगदान हुन्छ’, मन्त्रीहरुतर्फ संकेत गर्दै एमाले अध्यक्ष ओलीले भने, ‘यदि कसैले सन्तोषजक बनाउन चाहेन भने फरक ढंगले उपचार खोज्नुपर्ने हुन्छ ।’