वरिष्ठ अधिवक्ता थापाद्वारा पत्रकारलाई दुर्व्यवहार

News Summary

Generated by OK AI. Editorially reviewed.

शम्भु थापाले काठमाडौंस्थित नेकपा एकीकृत समाजवादी पार्टी कार्यालय बाहिर पत्रकारमाथि दुव्र्यवहार गरे।
उनले नेपाल प्रेसका पत्रकार उमेश कार्कीको क्यामेरामा आक्रमण गरे।
पार्टी कार्यालयमा कानुनी परामर्शका लागि पुगेका थिए।

२२ जेठ, काठमाडौं । नेकपा एकीकृत समाजवादी पार्टी कार्यालय बाहिर आफ्नो फोटो खिचेको भन्दै वरिष्ठ अधिवक्ता शम्भु थापाले पत्रकारमाथि दुर्व्यवहार गरेका छन् ।

उनी समाजवादी पार्टी कार्यालयबाट बाहिर निस्किरहेका बेला फोटो खिच्दै गरेका नेपाल प्रेसका फोटो पत्रकार उमेश कार्कीको क्यामेरामाथि आक्रमण गरेका थिए ।

फोटो खिचिरहेका बेला शम्भु थापाले सुरूमा के प्रयोजनका लागि फोटो खिचेको भनेर सोधेका थिए । लगत्तै उनले कार्कीको क्यामेरामा आक्रमण गरेका थिए ।

त्यसपछि फोटो पत्रकारहरूले सार्वजनिक ठाउँमा सार्वजनिक व्यक्तिको फोटो खिच्न पाईने तर्क गरेका थिए ।

पत्रकारहरूसँग वादविवादमा उत्रिएका वरिष्ठ अधिवक्ता थापालाई समाजवादीका पोलिटव्यूरो सदस्य सुदेश पराजुलीले त्यहाँबाट गाडिसम्म पुर्‍याएका थिए ।

थापासँगै वरिष्ठ अधिवक्ता गोविन्द बन्दी पनि थिए । यी दुबै अधिवक्ता नेकपा एकीकृत समाजवादीसँग नजिक छन् ।

पतञ्जली जग्गा प्रकरणमा भ्रष्टाचारको मुद्दा दायर भएपछि नेकपा एकीकृत समाजवादीले कानुनविदहरूसँग राय लिएको थियो । थापा र बन्दीसहितका कानुनविदहरू कानुनी परामर्श दिन नेकपा एकीकृत समाजवादीको पार्टी कार्यालय पुगेका थिए ।