अपहरण गरी १० लाख फिरौती लिएका व्यक्तिबाटै बूढानीलकण्ठमा युवकको हत्या

१ साउन, काठमाडौं । बूढानीलकण्ठमा भएको युवक हत्या प्रकरणका मुख्य योजनाकार बाबु लामा भनिने हिरालाल मोक्तान यसअघि पनि जघन्य अपराधको घटनामा जोडिएका व्यक्ति रहेको खुलेको छ ।

अपहरण तथा शरीर बन्धक घटनामा जोडिएका बाबुको योजनामा बुढानीलकण्ठ नगरपालिका-५ टुसालमा ३२ वर्षीय कृष्णकुमार लामाको हत्या भएको खुलेको हो ।

बाराको निजगढ नगरपालिका-८ घर भएका कृष्ण कुमार लामालाई जन्मदिन मनाउने भन्दै बोलाएर हत्या गरिएको थियो । कृष्णको हत्या यसअघि १२ वर्ष कैद बसेका बाबुको योजनामा भएको प्रहरी अनुसन्धानले देखाएको छ ।

बाबुले कृष्णलाई भान्जीको जन्मदिन मनाउन भन्दै बोलाएर ६ असार राति हत्या गरेको एक अनुसन्धान अधिकृतले बताए । कृष्णको हत्या आरोपमा एक नाबालकसहित ५ जनाविरुद्ध काठमाडौं जिल्ला अदालतमा कर्तव्य ज्यानको कसुरमा मुद्दा दायर गरिएको जिल्ला प्रहरी परिसर काठमाडौंका एसपी तथा प्रवक्ता अपीलराज बोहराले बताए ।

मकवानपुर घर भई बुढानीलकण्ठ नगरपालिका-५ टुसाल बस्ने विकास लामा लो, बारा निजगढ नगरपालिका-७ घर भएका २९ वर्षीय सुकान्त लामा, मकवानपुर बकैया गाउँपालिका-२ घर भएका २३ वर्षीय निसान जिम्बा र एक बालकलाई घटनाको प्रतिवादी बनाइएको छ ।

मुलुकी फौजदारी अपराध संहिता २०७४ को दफा १७७ मा उल्लेख भएअनुसार ज्यान मार्न नहुने कसुर गरेको आरोपमा उनीहरूविरुद्ध जन्मकैदको सजाय मागदाबी गरिएको छ । उनीहरूले योजना बनाएरै कृष्णको हत्या गरेको प्रहरी अनुसन्धानको निष्कर्ष छ ।

न्यायाधीश इश्वरीप्रसाद भण्डारीको बिहीबारको इजलासले योजनाकार बाबु लामा र विकास लामा लोलाई पुर्पक्षका लागि कारागार पठाउने आदेश जारी गरेको छ । अन्य दुई जना सुकान्त लामा र निशान लामालाई भने जनही १ लाख धरौटीमा रिहा भएको एसपी बोहराले बताए ।

रकम विवादमा हत्या

कृष्णको हत्या हुनुमा रकम विवाद जोडिएको अनुसन्धान अधिकृतको भनाइ छ । बाबुमार्फत लिएको भनिएको रकम कृष्णले फिर्ता नगरेपछि सोही निहुँमा उनको हत्या गरेको पाइएको एक अनुसन्धान अधिकृतले बताए ।

‘पटक-पटक हिसाब मिलानका लागि यसअघि पनि उनीहरूबीच विवाद हुने गरेको देखिएको छ । सोही निहुँमा योजनाबद्ध तरिकाले हत्या गरेको देखिन्छ,’ एक अनुसन्धान अधिकृतले भने ।

यसका लागि बाबुले आफ्नी भान्जीको जन्मदिनको मनाउन भन्दै कृष्णलाई बोलाएर बुढानीलकण्ठ लगेको पाइएको छ । ६ असारमा बाबुको दिदी कान्छीमाया लोकी छोरी पुनमको जन्मदिन समेत रहेको थियो । बाबुले बोलाएपछि कृष्ण पनि कान्छीमायाको घर गएका थिए ।

जन्मदिनमा उनीहरूले मदिरा पनि पिएका थिए । त्यसपछि राति कृष्णमाथि कृटपिट भएको पाइएको छ । ७ असारको बिहानका राति १ बजेसम्म कुटपिट भएको प्रहरीको भनाइ छ ।

कुटपिटपछि मृत्यु भएका कृष्णको शव पोस्टमार्टमका लागि त्रिवि शिक्षण अस्पताल महाराजगञ्ज पठाइएको थियो । पोस्टमार्टम रिपोर्टमा समेत ब्लन्ड फोर्स इन्जुरी उल्लेख गरिएको छ ।

प्रतिवादी विकास लामा लोको मोबाइलमा कृष्णलाई रक्ताम्य हुनेगरी कुटपिट गरी नांगो पारेर भुइँमा लडाएको भिडिओमा देखिन्छ । जहाँ उनी छटपटाइरहेको देखिन्छ ।

कल डिटेल रिपोर्ट (सीडीआर)मा पनि उनीहरूबीच एकले अर्कोलाई पटक-पटक सम्पर्क गरेको भेटिएको छ । विवादमा परेका बालकले पनि कृष्णको मोबाइलमा पटक-पटक सम्पर्क गरेको भेटिएको छ ।

प्रतिवादीहरू सबै र मृतकको मोबाइल लोकसेन ६ गते दिउँसो धुम्बाराही र साँझदेखि ७ गते बिहानसम्म बुढानीलकण्ठमा देखिएको छ ।

प्रतिवादीहरूले भने कृष्णले आफूहरूको संवेदनशील अंकमा छुने र हिर्काउने गरेकाले सोही निहुँमा कुटपिट गर्दा हत्या भएको दाबी गरेका छन् ।

१२ वर्ष जेल बसेर छुटेका व्यक्ति नै योजनाकार

हत्याका मुख्य योजनाकार भनिएका बाबु, प्रतिवादी सुकान्त र मृतक कृष्ण समेत बारा लगायत तराईका जिल्लामा चोरी, लुटपाट तथा गुण्डागर्दीमा संलग्न व्यक्तिहरू रहेको प्रहरीको भनाइ छ ।

कतिसम्म भने, बाबु व्यक्ति अपहरण तथा शरीर बन्धकको कसुरमा १२ वर्ष कैद बसेर निस्केका व्यक्ति रहेको पाइएको छ ।

२४ भदौ २०६८ मा टेकनाथ पौडेललाई अपहरण गरेको प्रकरणमा बाबुलाई सर्वोच्च अदालतले १२ वर्ष कैद सजाय सुनाएको थियो । बाराको साविक सपही गाविस-२ स्थित तामागढीको जंगलमा पर्ने ग्राबेल सडकबाट राति पौडेलको अपहरण भएको थियो ।

पौडेललाई अपहरण गरेर १० लाख फिरौती समेत लिइएको थियो । पौडेल अपहरणमा अहिले पक्राउ परेका बाबुसहितका व्यक्तिले अपहरण गरेका थिए । कृष्ण हत्यामा अहिले हिरासतमा रहेका बाबु लामा हिरालाल बाबु, चोरबाबु, कालेबाबु उपनामले समेत चिनिन्थे ।

राति साढे ८ बजे अपहरणमा परेका पौडेल १० लाख रुपैयाँ फिरौती बुझाएपछि एक दिनपछि अपहरणमुक्त भएका थिए । दशैं आउन लाग्यो, खर्च जुटाउनु पर्‍यो भन्दै अपहरणकारीले हेटौंडाको होटल सेन्टर प्वाइन्टमा योजना बनाएर पौडेललाई अपहरण गरेका थिए ।

सुरुमा ३० लाख रुपैयाँबाट बार्गेनिङ सुरु गरेका उनीहरूले १० लाख फिरौतीमा सहमत भई पौडेललाई छोडेका थिए । यो अपहरणमा बाबुका साथै डुडे भनिने तिलक लामा, सन्दीप लामा, फुच्चे भन्ने एक व्यक्ति, अनिल लामालगायत संलग्न थिए ।

बारा जिल्ला अदालतले १४ वैशाख २०७१ मा बाबुसहित तीनजनालाई जनही १२ वर्ष कैद र जरिवाना सुनाएको थियो । बाँकी तीनजना फरार थिए । जिल्लाबाट पुनरावेदन (हाल उच्च) अदालत हुँदै यो मुद्दा सर्वोच्चसम्म आएको थियो ।

१५ साउन २०७५ मा सर्वोच्च अदालतका न्यायधीश चोलेन्द्र शमशेर जबरा र विश्वम्भरप्रसाद श्रेष्ठको इजलासले १२ वर्ष कैदलाई सदर गर्दै १० लाख रुपैयाँको जनही बिगो ३ लाख ३३ हजार ३३३ जरिवाना हुने फैसला गरेको थियो ।

यो अपहरणमा कारागार बसेर बाबु करिब डेढ वर्षअघि मात्रै छुटेका थिए । अपहरण तथा गुण्डागर्दीबाट आर्जन गरेको रकम विवादमा कृष्णको हत्या भएको देखिएको एक अनुसन्धान अधिकृतले अनलाइनखबरलाई बताए ।

‘मृतक र योजनाकार दुवैको पृष्ठभूमि विवादित देखिन्छ । आपराधिक गतिविधिबाट आर्जन गरेको रकममा विवाद हुँदा नै हत्या भएको अनुसन्धानले देखाएको छ,’ एक अनुसन्धान अधिकृतले भने ।

बाबु कारागारमा हुँदा समेत कृष्ण भेट्न जाने गरेको पनि अनुसन्धानबाट खुलेको छ । मृतकका आफन्तले दिएको जाहेरीमा समेत हिसाब मिलाउन भन्दै बाबुले बोलाउने गरेकाले कृष्ण पटकपटक कारागार गएर भेट्ने गरेको उल्लेख गरिएको छ ।

हिसाब नमिलाएपछि थुनामुक्त भएपछि ज्यान मार्नेसम्मको धम्की आएको र अहिले हत्या भएकाले योजनाबद्ध रूपमा कृष्णको हत्या भएको बताइएको छ ।

मृतक कृष्णले समेत बाबुबाहेक अरू प्रतिवादी समेत नचिनेको प्रहरी अधिकारीहरू बताउँछन् । जेल परेपछि पुरानो हिसाब चुक्ता हुन बाँकी रहेको भन्दै बाबुले ताकेता दिएको र रकम फिर्ता नदिएपछि हत्या गरेको पाइएको प्रहरीको भनाइ छ ।