सडकदेखि स्टेजसम्म : अमृत र बेनीको सांगीतिक प्रेम 

बार्सिलोना। माल्टा फेयर एन्ड कन्भेन्सन सेन्टर। रंगीन बत्तीहरूले चम्किरहेको विशाल हल, दर्शकको उत्साहले तातिरहेको वातावरण । क्षणभर सम्पूर्ण हल अन्धकारमा डुब्छ।त्यहाँ अमृत गुरुङको स्वर गुञ्जिन्छ-

‘चरी मर्‍यो सिसैको गोलीले…।’ 

एकैछिनमा हल ताली र चिच्याहटले थर्थराउँछ । संगीत र भावनाले भरिएको त्यो क्षणमा, भीडभित्र एउटा अनुहारमा फरक चमक देखिन्छ। ७१ वर्षको एक वृद्ध, सेतो कपाल, चस्मा र बुट्टे कमिज लगाएका बेनी ग्रिमा । एक माल्टिज कलाकार। 

केही दिनअघि सडकमा यही गीत गाएर अनौठो तरिकाले अमृतसँग उनको कथा सुरु भएको थियो। आज, उनी त्यो कथाको अर्को अध्याय बाँच्दैछन्-भीडभित्रबाट, आफ्नो प्रेरणालाई हेर्दै।

केही दिनअघि सडकमा गीत गाउने बेनीलाई देख्दा अमृत मन्त्रमुग्ध भएका थिए । तर बुधबारको दृश्य बिल्कुलै उल्टिएको थियो । यसपटक अमृत गुञ्जिरहेका थिए र बेनी मन्त्रमुग्ध थिए। उनी भीडभित्र रमाउँदै, जोशसहित अमृतसँगै गीतमा डुबिरहेका थिए । स्टेजबाट गुञ्जिरहेको ‘चरी मर्‍यो सिसैको गोलीले’ गीतमा बेनी पनि सँगसँगै गाउन थाले।

उनको अनुहारमा झल्किएको खुशी, उत्साह र त्यो ऊर्जा देखेर लाग्थ्यो-साँच्चै संगीतको कुनै सीमा हुँदैन। बेनी तालमा हराउँदै अमृतसँगै स्वर मिलाइरहेका थिए। त्यो दृश्यमा संस्कृतिको दूरी हराएको थियो, बाँकी थियो त केवल धुन र भावना।

यो क्षण केवल एउटा सांगीतिक भेट थिएन; यो दुई संस्कृतिको अद्‍भुत संगम थियो । एकातिर नेपालबाट आएको दिग्गज ब्यान्ड, अर्कोतिर माल्टाको सडकमा गितार बोकेर गीत गाउँदै जिउन रमाउने कलाकार। दुवैलाई जोड्ने डोरी एउटै थियो- संगीत ।

अमृतको सादगीले यो भेटलाई अझ खास बनायो । वेम्बलीमा हजारौं दर्शकअगाडि गाइसकेका अमृतले सडकमा गीत गाउने बेनीलाई पनि उति नै सम्मान दिए जति सम्मान सायद उनले वेम्बलीमा पाए, उति नै उनले बेनीलाई दिएको स्पष्ट झल्कन्थ्यो।

बेनीको सडक प्रेम

नेपथ्यको कन्सर्टमा सहभागिता जनाएका माल्टिज कलाकार बेनीलाई अनलाइनखबरले सम्पर्क गर्न खोज्यो। ह्वाट्सएपमा उनले जवाफ दिए: ‘म अहिले कुराकानी गर्न सक्दिनँ। म लाइभ गाइरहेको छु र सडकमा यहाँ थुप्रै मानिसहरु छन् । राति ११:३० बजे सम्पर्क गर्नु ।’

यसबाट बेनीको संगीतप्रतिको गहिरो लगाव स्पष्ट देखिन्छ । उनका दर्शकहरू उनका समयको पहिलो प्राथमिकता हुन्- सडकका मान्छेहरू। बाँकी समय उनी अरूलाई दिन्छन् ।

अन्तत: ७१ वर्षीय बेनी आफूले भनेकै समयमा अनलाइनखबरको सम्पर्कमा आए । कुराकानी गर्दै भने, ‘मैले सबैभन्दा पहिले सिकेको नेपाली गीत ‘रेशम फिरिरी’ हो । त्यसपछि सिकेको अर्को गीत ‘चरी मर्‍यो’ हो । केही वर्षअघि मैले नेपथ्यको यो गीत नेपालीहरूमार्फत सुनेँ । उनीहरूले नै मलाई सिक्न प्रेरित गरे । त्यसपछि म स्टुडियो गएँ, त्यो गीत धेरै पटक सुनेँ, अनि बजाउन र गाउन सिकेँ ।’

तर उनी जान्दैनथे- यो गीत गाउने बेलामा सडकमा उनी नेपथ्यका गायक अमृत गुरुङसँग कहिल्यै सामना गर्नेछन् भनेर। बेनीले सडकमा ‘चरी मर्‍यो’ गाउँदा धेरै नेपाली दंग परे । ‘मलाई नेपाली गीत हो भन्ने मात्र थाहा थियो । यो गीत यति चर्चित रहेछ भन्ने कुरा कन्सर्ट हेरेर मात्रै बुझें । गायक पनि निकै चर्चित हुनुहुँदो रहेछ र उहाँ असाध्यै सरल लाग्यो,’ बेनी मुस्कुराउँछन्।

कन्सर्ट पछि उनले अर्को लक्ष्य तय गरिसकेका छन् । ‘नेपथ्यको कन्सर्टमा ‘रेशम’ बोलको गीत सुनेर म झन् मोहित भएँ । अहिले त्यही सिक्न थालेको छु । अर्को हप्तादेखि सडकमा गाउन सुरु गर्नेछु । शब्दहरू याद भइसकेका छन् । स्टुडियोमा म रेशमको धुनसँग अहिले खेलिरहेको छु । तपाईंहरूले चाँडै सडकमा सुन्नुहुनेछ,’ उनले भने। 

कन्सर्टको अविस्मरणीय त्यो रात

नेपथ्यको माल्टा कन्सर्टमा पहिलोपटक स्टेजमा अमृतलाई देख्दा बेनी अचम्ममा परे । ‘कन्सर्ट अन्तर्राष्ट्रिय स्तरको थियो । विश्वका चर्चित कलाकारभन्दा कुनै कमी थिएन । मैले आयोजकको निमन्त्रणामा भाग लिएको थिएँ । जब  ‘चरी मर्‍यो’ गाउन थाले, त्यो क्षण अविस्मरणीय थियो । म मात्र होइन, सबै नेपालीले उनीसँगै गाए। मलाई त्यो बेला गर्व लाग्यो- मैले यस्तो गीत सिकेको रहेछु जुन जहाँसुकै नेपालीले गाउन सक्ने रहेछन्,’ बेनी सम्झन्छन् ।

उनी अमृत गुरुङको स्टेज एनर्जीबाट प्रभावित भए- ‘जुन जोशले उनले प्रस्तुति दिए, त्यो मेरो जीवनको सम्झनालायक क्षण हो । कलाकारमा हुनुपर्ने सबै गुण भेटें ।’

भिडियो भाइरल भएपछि 

अनलाइनखबर मार्फत बेनीलाई थाहा भयो- उनले सडकमा गाएको गीतको भिडियो अमृत गुरुङले आफ्नो फेसबुकमा पनि शेयर गरेका छन्। त्यो भिडियो अहिलेसम्म ११ लाखभन्दा बढीले हेरेका छन् । ‘हो र !’ आश्चर्य मान्दै बेनीले भने, ‘मलाई थाहा नै थिएन। अब म हेर्छु। त्यो त मेरो लागि ठूलो कुरा हो ।’

नेपथ्यलाई भेटेपछि आफू माल्टामा झनै लोकप्रिय बनेको बताउँछन् । ‘सबैजना मलाई भेट्न आउँछन्, कुरा गर्छन् । सायद अहिले त इन्टरनेटमार्फत धेरै नेपालीले चिन्छन् होला,’ उनले थपे ।

बेनी भन्छन्, ‘हरेक दिन सडकमा, आइसक्रिम पसल अगाडि नेपाली भेटिन्छन्। उनीहरूलाई सम्मान गर्न र नेपालप्रतिको मायाले गर्दा म नेपाली गीत गाउने गर्छु । मैले धेरै देशका धेरै भाषाका गीत गाएको छु, तर नेपाली संगीतसँगको अनुभव बेग्लै छ। नेपथ्यको कन्सर्टले त मलाई झन् प्रभावित बनायो ।’

उनले अन्त्यमा भने, ‘म नेपाली संगीतमा रमाएको छु। कन्सर्टमा जाँदा मलाई नेपालीहरूले राजालाई जस्तै व्यवहार गरे । कसैले पनि अभद्र व्यवहार गरेनन्। सबै रमाए । आखिर त्यो नै हो- साँचो संगीतप्रतिको सम्मान ।’

आयोजक नेपाल माल्टा फुटबल क्लब (एनएमएफसी) का अध्यक्ष राजेन्द्र विष्ट भन्छन्, ‘हामीले नेपथ्य टिमलाई खासमा त्यो दिन भ्यालेटा घुम्न लिएर गएका थियौं । बेनीसँग भेट भयो ।’

विष्ट थप्छन्, ‘उनलाई कन्सर्टमा आउने विशेष निमन्त्रणा पनि दियौं । यो कन्सर्टले नेपालीको मात्रै होइन, उनी जस्तै थुप्रै माल्टिजहरुको पनि मन जितेको छ। नेपाली संगीत विश्वमाझ चिनाउन पाउँदा हामी असाध्यै खुशी छौँ ।’