चुनावमा मताधिकारको प्रयोग गर्न स्टेजबाटै अमृत गुरुङको आग्रह

भ्यालेन्टाइन्स डेको अवसरमा शनिबार बन्दीपुरमा प्रस्तुति दिँदै 'नेपथ्य' ब्याण्डका गायक अमृत गुरुङ ।

News Summary

Generated by OK AI. Editorially reviewed.

लोकप्रिय नेपाली लोकरक ब्याण्ड नेपथ्यले प्रतिनिधिसभा निर्वाचनमा मताधिकार प्रयोग गर्न नागरिकलाई आग्रह गरेको छ।
ब्याण्डका प्रमुख गायक अमृत गुरुङले फागुन २१ मा हुने चुनावमा सबैले मतदान गर्नुपर्ने बताउनुभयो।
नेपथ्यले बन्दीपुर कन्सर्टमा राष्ट्रिय एकता र मताधिकार प्रयोगको महत्त्वबारे बोलेको थियो।

बन्दीपुर (तनहुँ) । लोकप्रिय नेपाली लोकरक ब्याण्ड ‘नेपथ्य’ ले आसन्न प्रतिनिधिसभा निर्वाचनमा मताधिकारको प्रयोग गर्न नागरिकलाई आग्रह गरेको छ । केही दिनअघि यहाँ आयोजित भब्य कन्सर्टमा ब्याण्डका प्रमुख गायक अमृत गुरुङले स्टेजमार्फत भोटको अधिकार प्रयोग गर्न आग्रह गरे ।

‘फागुन २१ मा चुनाव हुँदैछ । सबैजना आ-आफ्नो ठाउँबाट गएर नागरिकको रुपमा मताधिकार प्रयोग गर्नूस’ गुरुङले भने, ‘हाम्रो देश अरु कोही आएर बनाइदिन्न । हामी आफैले बनाउने हो ।’

उनले सबैभन्दा आफूहरू नेपाली भएको बताउँदै चन्द्रसूर्य रहेसम्म नेपाल रहिरहने बताए । उनले नेपाली- नेपालीबीच राष्ट्रिय एकता जरुरी रहेको बताउँदै सबैजना नेपाली एक भएमा कसैले नेपाललाई हेप्न नसक्ने बताए ।

पछिल्लो महिना लगातार ४ ठाउँमा ब्याण्डले कन्सर्ट गरेको थियो । ती सबै ठाउँको प्रस्तुतिमा गुरुङले मताधिकारको प्रयोगदेखि राष्ट्रिय एकता र भावनाबारे बोलेका थिए ।

दशौं हजार सहभागी बन्दीपुर कन्सर्टमा गुरुङले मताधिकारको प्रयोग गर्न आग्रह गर्दा उपस्थित सबैले तालीले समर्थन जनाएका थिए । ब्याण्डले आफ्ना हिट गीतहरूमार्फत उक्त अवसरमा दर्शकलाई नचाएको थियो ।

अबको दुई सातापछि ब्याण्ड भारतको सिलिगुढीमा पहिलोपटक गुञ्जिने तयारीमा छ । सरकारले २१ फागुनलाई प्रतिनिधिसभा चुनावको मिति तोकेको छ ।