जेनजी भन्दै धम्क्याउने शाही वैदेशिक ठगीमा फरार देखिएपछि प्रहरीले विभागलाई बुझायो

News Summary

Generated by OK AI. Editorially reviewed.

अर्जुनबहादुर शाहीलाई प्रहरीले कोटेश्वरबाट पक्राउ गरी वैदेशिक रोजगार विभाग ताहचलमा बुझाएको छ।
शाहीले विभिन्न सरकारी कार्यालयमा धम्क्याउने काम गरेको र उसविरुद्ध बैंकिङ कसुरको उजुरी परेको छ।
शाहीबाट प्रहरीले असई कुमार शर्माको परिचय पत्र बरामद गरेको छ, जसले आफ्नो कार्ड हराएको बताएका छन्।

३० असोज, काठमाडौं । जेन–जी भन्दै विभिन्न सरकारी कार्यालयहरुमा गएर धम्क्याउने गरेका अर्जुनबहादुर शाहीलाई प्रहरीले वैदेशिक रोजगार विभाग ताहचलमा बुझाएको छ ।

बुधबार कोटेश्वरबाट पक्राउ परेका शाहीलाई बिहीबार विभागमा बुझाइएको जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईले बताए । उनीविरुद्ध विभिन्न प्रहरी कार्यालयहरुमा बैकिङ कसुरको उजुरी समेत परेको छ ।

पक्राउ परेका शाहीबाट प्रहरीको परिचय पत्र समेत भेटिएको छ । कुमार शर्मा नामको असई (प्रहरी सहायक निरीक्षक)को आईडी कार्ड शाहीबाट बरामद भएको छ । यो नाम परेका असई अख्तियार दुरुपयोग अनुसन्धान आयोगमा कार्यरत छन् । अहिले उनी इन्स्पेक्टर निकालेर तालिममा जाने तयारीमा छन् । शर्माले आफ्नो कार्ड हराएको बताएका छन् ।

अछामको पञ्चदेवल विनायक नगरपालिका–४ घर भएका २६ वर्षीय शाहीको टोलीले नागरिक उड्डयन प्राधिकरण, नेपाल वायु सेवा निगमदेखि अख्तियार दुरूपयोग अनुसन्धान आयोगको केन्द्रीय कार्यालयमसम्म पुगेर अनुगमन र ज्ञापनपत्रको नाममा धम्क्याएको थियो ।

केही दिनअघि मात्रै नागरिक उड्डयन प्राधिकरणको कार्यालयमा पुगेको शाहीको टोलीले प्राधिकरणका महानिर्देशक प्रदीप अधिकारीको राजीनामा नै माग गरेको थियो ।