सिड्नी बस्दै आएका कुमार शर्माको उपन्यास ‘कम्पनी’ सार्वजनिक

News Summary

Generated by OK AI. Editorially reviewed.

साहित्यकार कुमार शर्माको पहिलो उपन्यास कम्पनी अस्ट्रेलियाको सिड्नीस्थित ब्ल्याकटाउन सिटी काउन्सिलको आयोजनामा लोकार्पण भएको छ।

२८ माघ, काठमाडौं । साहित्यकार कुमार शर्माको पहिलो उपन्यास ‘कम्पनी’ सार्वजनिक भएको छ । अस्ट्रेलियाको सिड्नीस्थित ब्ल्याकटाउन सिटी काउन्सिलको आयोजनामा उपन्यास लोकार्पण भएको हो । गार्गी शर्मा, ज्ञानु वाकर पौडेल, कुमार शर्मा, सानु घिमिरे र शौरभ श्रेष्ठले संयुक्त रूपमा उपन्यासको लोकार्पण गरे ।

कार्यक्रममा लेखक, अग्रज साहित्यकार र नेपाली डायस्पोरिक समुदायको उल्लेख्य सहभागिता थियो ।

सानु घिमिरेले पुस्तक संवादको संयोजन गर्दै उपन्यासका विविध आयामबारे चर्चा गरे । ‘महबी मिका’ का लेखक प्रकाश पन्थी र ‘विषाणु ऋ’ उपन्यासकी सर्जक प्रज्ञा पनेरुले लोकार्पित पुस्तक ‘कम्पनी’ माथि समीक्षात्मक टिप्पणी गरे ।

करिब एक दशकदेखि सिड्नीमा बसोबास गर्दै आएका शर्मा अस्ट्रेलियाको पोस्टल सर्भिसेजमा कार्यरत छन् । लामो समय अखबारी लेखनमा संलग्न रहेपछि उनी आख्यान लेखनतर्फ लागेका हुन् ।

‘कम्पनी’ उपन्यास दक्षिण कोरियाको सोल शहरमा बस्ने एक विद्यार्थी र मजदुर जीवनको दोसाँध वरिपरि केन्द्रित छ । परम्परागत बाटो नहिँडेर आफ्नो मनको आवाज सुन्ने एक युवकको ‘कमिङ अफ द एज’ कथा यस उपन्यासमा प्रस्तुत गरिएको छ।

उपन्यास बुक हिल पब्लिकेशनले प्रकाशित गरेको हो । Thuprai.com र Kitabyatra.com मार्फत देश–विदेशबाट, साथै Kitabadda.com.au र saramsha.com.au मार्फत अस्ट्रेलियाभरि सजिलै अर्डर गर्न सकिने व्यवस्था गरिएको छ।