‘एकम् भजन साँझ’ सम्पन्न : युवापुस्तालाई संस्कृति र परम्परासँग जोड्ने उद्देश्य

Listen News

0:00

0:30

🔊

News Summary

Generated by OK AI. Editorially reviewed.

महाशिवरात्रिको अवसरमा ललितपुरको भैंसेपाटी खेलमैदानमा २५ सयभन्दा बढी दर्शकसहित ‘एकम् भजन साँझ’ सम्पन्न भएको छ।
कार्यक्रममा १० भन्दा बढी कलाकारले लाइभ प्रस्तुति दिएका थिए र कत्थक नृत्य प्रस्तुत गरिएको थियो।
यज्ञशाला फाउन्डेशनले युवालाई संस्कृति र परम्परासँग जोड्ने तथा आध्यात्मिक पर्यटन प्रवर्धन गर्ने लक्ष्य राखेको छ।

काठमाडौं । महाशिवरात्रिको अवसरमा आयोजित भक्तिमय सांगीतिक कार्यक्रम ‘एकम् भजन साँझ’ शनिबार ललितपुरको भैंसेपाटी खेलमैदानमा सम्पन्न भएको छ । कार्यक्रममा २५ सयभन्दा बढी दर्शक सहभागी थिए ।

प्रगति युवा क्लवको सहयोगमा यज्ञशाला फाउन्डेशनद्वारा आयोजित उक्त कार्यक्रममा संगीतकार, नृत्यांगना, पुरोहित तथा आध्यात्मिक पर्यटन क्षेत्रमा क्रियाशील व्यक्तिको सहभागिता थियो ।

कार्यक्रममा १० भन्दा बढी कलाकारको लाइभ प्रस्तुति तथा कत्थक नृत्य प्रस्तुत गरिएको थियो, जसले दर्शकलाई आध्यात्मिक अनुभूतिसहितको सांस्कृतिक अनुभव प्रदान गरेको थियो । त्रिशला गुरुङ, उज्ज्वल सागर, रोहित शाक्य, रिदम कँडेललगायतका कलाकारले प्रस्तुति दिएका थिए ।

‘एकम् भजन साँझ’ को उद्देश्य युवापुस्तालाई संस्कृति र परम्परासँग पुनः जोड्नु, भक्तिमार्फत शान्ति र मानसिक सन्तुलन प्रवर्धन गर्नु तथा सामूहिक एकताको भावना अभिवृद्धि गर्नु हो । साथै, नेपालमा आध्यात्मिक सांगीतिक सभाका लागि नयाँ मापदण्ड स्थापित गर्ने लक्ष्य पनि कार्यक्रमले राखेको छ ।

‘यस कार्यक्रममार्फत हामी समुदाय केन्द्रित कार्यक्रमको नमुना प्रस्तुत गर्न चाहन्छौँ र नेपाललाई आध्यात्मिक तथा अनुभवात्मक पर्यटनको केन्द्रका रूपमा विकास गर्ने आधार तयार गर्न खोजिरहेका छौं’ यज्ञशाला फाउन्डेशनका संस्थापक निर्जन अधिकारीले बताए ।