गोरखा-२ कांग्रेसका उम्मेदवार दवाडीको प्रतिवद्धता : युवालाई रोजगारी, पर्यटन र पूर्वाधार विकासमा जोड

१३ फागुन, गोरखा । नेपाली कांग्रेस गोरखा क्षेत्र नं २ का प्रतिनिधिसभा सदस्यका उम्मेदवार प्रकाशचन्द्र दवाडीले गोरखा–२ को विकासका लागि आफ्नो प्रतिवद्धता सार्वजनिक गरेका छन् ।

दवाडीले निर्वाचन क्षेत्रअन्तर्गत सिरान्चोक गाउँपालिकाको चोरकाटेमा पत्रकार सम्मेलन गरी प्रतिवद्धता पत्र सार्वजनिक गरेका हुन् ।

उनले भ्रष्टाचारलाई शून्य सहनशीलताको नीति अनुरूप राज्यका सबै तहहरूमा भ्रष्टाचारजन्य गतिविधिहरूलाई निस्तेज गर्न नीतिगत र संरचनागत सुधारका लागि पहल गर्ने उल्लेख गरेका छन् ।

दवाडीले सांसद निर्वाचित भए प्राप्त गर्ने सरकारी सेवा सुविधा सामाजिक सेवामा उपयोग गरिने र सांसदको हैसियतमा वार्षिक रूपमा गरेको कामको प्रतिवेदन सार्वजनिक गर्ने बताएका छन् । त्यस्तै इ-गभर्नेन्स, इ-फाइनान्स र इ-म्यानेजमेन्टजस्ता डिजिटल प्लेटफर्महरूको उपयोग गरी सुशासनको प्रत्याभूति दिइने उनको भनाइ छ ।

उनले निर्वाचन क्षेत्र भित्रका महत्वपूर्ण रणनीतिक आयोजना तथा पूर्वाधार निर्माणका लागि सम्बन्धित क्षेत्रका विज्ञहरूसँग छलफल तथा परामर्श गरी आयोजना छनोट गर्ने पद्दतिको विकास गर्ने पनि बताएका छन् ।

आफ्नो क्षेत्रभित्र रहेका ३८ वटै वडा कार्यालयसम्म जाने मुख्य सडकहरू ५ वर्षभित्र स्तरोन्नति गर्दै कालोपत्रे गर्ने योजना अघि बढाउने, निर्माणका क्रममा रहेका र अलपत्र परेका आयोजनाहरूलाई समयमै सम्पन्न गर्न दबाब दिने उनको प्रतिबद्धता छ ।

गोरखा नगरपालिका र अन्य पालिकाहरूलाई व्यवस्थित गर्न सडक, खानेपानी र ढल निकासलाई व्यवस्थित गर्दै डिजिटल सेवा सुचारु गर्न पहल गर्ने, निर्वाचन क्षेत्रभित्रका खेलमैदानलाई व्यवस्थित गरी राष्ट्रिय स्तरमा प्रतिस्पर्धा गर्न सक्ने खेलाडी उत्पादन गर्न विभिन्न खेलकुद प्रतियोगिता आयोजना गर्ने र खेलाडीहरूलाई आवश्यक प्रशिक्षणको व्यवस्थाका लागि आवश्यक कार्य गर्ने उनको प्रतिवद्धता छ ।

उनले स्कुल, कलेजहरूको गुणस्तर वृद्धिमा आवश्यक पहल गर्ने, प्रत्येक गाउँपालिकामा मेघा विद्यालय स्थापनाका लागि पहल गर्ने, हरेक माध्यमिक विद्यालयमा नर्सको व्यवस्था गरी प्राथमिक स्वास्थ्य सेवा उपलब्ध गराउन स्थानीय तहसँग सहकार्य गर्ने पनि बताएका छन् ।

निर्वाचन क्षेत्रभित्र गुणस्तरीय सञ्चार तथा इन्टरनेट सेवा विस्तारका लागि पहल गर्ने, नैतिक शिक्षाका माध्यमबाट नेपाली समाजको इतिहास, धर्म, संस्कार, संस्कृति, सभ्यता, मानवता, परोपकार र सामाजिक सद्भावसहितको सभ्य समाज निर्माण गर्न नीतिगत पहल गरिने प्रतिवद्धतापत्रमा उल्लेख छ ।

यसैगरी, विपन्न स्वास्थ्य सेवा कोषको व्यवस्था गरी बाल स्वास्थ्य, ज्येष्ठ नागरिक, विपन्न, शारीरिक रूपमा अशक्तहरूको स्वास्थ्य उपचारको व्यवस्था मिलाइने, स्वास्थ्य बिमालाई सरल, सहज र प्रभावकारी रूपमा लागू गरिने उनको प्रतिवद्धता पत्रमा उल्लेख छ । प्रसूति तथा अन्य आकस्मिक स्वास्थ्य सेवा तथा रिफरका लागि निःशुल्क एम्बुलेन्सको व्यवस्था पनि प्राथमिकतामा राखेको उनले बताए ।

दवाडीले पालुङ्टार नगरपालिकाको आँपपिपल अस्पताल र निर्वाचन क्षेत्रभित्रका सबै प्राथमिक स्वास्थ्य केन्द्रहरू, हेल्थपोस्ट र स्वास्थ्य इकाइहरूको स्तरोन्नति गरी सेवा बढाउन पहल गर्ने पनि बताएका छन् ।

मुटुरोग, क्यान्सर, दम, खोकी, मधुमेह, मानसिक रोग जस्ता समाजमा व्याप्त रहेका नसर्ने रोगहरू दीर्घ रोगहरूको गाउँटोलमा नियमित जाँचसहितको स्क्रिनिङ सेवाको माध्यमबाट समयमा नै रोगको पहिचान, रोकथाम र उपचारको व्यवस्था मिलाइने प्रतिवद्धता व्यक्त गरेका छन् ।

सुरक्षित खानपानका लागि शुद्ध पानीको व्यवस्था गरिने र पानीको मुहानबाटै शुद्धताका लागि ल्याब परीक्षण गरिने प्रतिवद्धतापत्रमा उल्लेख छ । यसैगरी, जमिन बाँझो नराख्न प्रोत्साहित गरी स्थानीय निकाय र प्रदेश सरकारको समन्वयमा ठोस नीतिगत व्यवस्था गर्न आवश्यक पहल गरिने बताइएको छ ।

निर्वाचन क्षेत्रभित्रका खेतीयोग्य जमिनको पहिचान गरी माटो परीक्षण गर्ने र माटो सुहाउँदो उच्च मूल्य भएको अलैँची, अदुवा, बेसार, टुसा, जौ, कफी, टिमुर, आलु, उखु, अमिलो जातका फलफुल (सुन्तला, निबुवा र कागती), जैतुन खेती, लिची, आँप, केरा खेती र स्याउ खेती लगायत नगदे बालीको पकेट क्षेत्र विस्तार, भण्डारण, बजारीकरणको व्यवस्था गरी किसानको आयआर्जनमा वृद्धिका लागि काम गरिने बताइएको छ ।

प्रतिवद्धतापत्रमा मानव–वन्यजन्तु (बाँदर, बाघ, हरिण, मृग आदि) सहअस्तित्व कायम गरी राष्ट्रिय निकुञ्जमा स्थानान्तरण गर्ने लगायतका विषयमा नीतिगत व्यवस्थाका लागि पहल गरिने उल्लेख छ । यसैगरी, दरौँदी, मस्र्याङ्दी, चेपे जस्ता नदीहरूमा नदी नियन्त्रण आयोजना मार्फत दायाँबायाँको भू–भागलाई संरक्षण गरी कृषि उत्पादनमा पहल गरिने बताइएको छ ।

वैदेशिक रोजगारीमा गएका गोरखा क्षेत्र नं २ बासी, जो नेपाल फर्कन चाहन्छन् उनीहरूलाई सहुलियत ऋण उपलब्ध गराउन नीतिगत व्यवस्थाका लागि पहल गरिने प्रतिवद्धतापत्रमा उल्लेख छ ।

बारपाक सुलिकोट, अजिरकोट र सिरानचोक गाउँपालिकाको माथिल्लो भेगमा पाइने निगाला तथा बाँसजन्य वनस्पतिहरूको परम्परागत तथा आधुनिक समग्री निर्माण गरी व्यावसायीकरण र उचित बजारीकरण गरिने बताइएको छ ।

यसैगरी, लोपोन्मुख ताल तलैया, पोखरी, कुवा संरक्षण तथा नयाँ पुनर्भरण, पोखरी निर्माण गरी भूमिगत सिंचाईँ तथा खानेपानीको व्यवस्थाका लागि पहल गरिने बताइएको छ । क्षेत्रभित्र रहेका विभिन्न खेतीयोग्य टारमा केन्द्रीय स्तरको सिंचाईँ आयोजनाहरू सञ्चालन गर्ने नीतिगत व्यवस्था गरिने प्रतिवतापत्रमा उल्लेख छ । निर्वाचन क्षेत्रभित्रका सबै परिवारलाई सहज रूपमा गुणस्तरीय विद्युत सेवा विस्तार गरिने उनको भनाइ छ ।

प्रतिवद्धतापत्रमा निर्वाचन क्षेत्रमा रहेका विभिन्न कोट तथा आध्यात्मिक स्थललाई व्यवस्थित गरी योग तथा ध्यान केन्द्रका रूपमा विकास गर्न पहल गरिने उल्लेख छ ।

गोरखाको बारपाक सुलिकोट गाउँपालिका, अजिरकोट गाउँपालिका हुँदै लमजुङको दूधपोखरी, दोर्दी र मर्स्याङ्दी गाउँपालिका जोड्ने ‘बुद्धहिमाल- हिमालचुली- ग्रेट लेक सर्किट’ को विकास गरी युवाहरूलाई रोजगारसँग जोडिने बताइएको छ ।

सौरपानीको घुन्चोक पोखरीलाई पुनर्जीवन दिन आवश्यक पूर्वाधार निर्माण गरी पर्यटकीय गन्तव्यका रूपमा विकास गर्न पहल गरिने घोषणापत्रमा बताइएको छ । सिरानडाँडा-निम्चेपोखरी-नागेपोखरी- दूधपोखरी र सिरानडाँडा- नागेपोखरी, नारदपोखरी-रुविनाला जाने मनास्लु पदमार्ग निर्माण गरिने बताइएको छ ।

बारपाक गाउँको पर्यटन प्रवर्द्धन गर्न भित्री वस्तीरूमा मौलिक र परम्परागत पर्यटन क्षेत्रको विकास गरिने, ऐतिहासिक सीतागुफालाई पर्यटकीय स्थलका रूपमा विकास गर्न आवश्यक कार्य गरिने, ऐतिहासिक, धार्मिक, सांस्कृतिक, पर्यटकीय क्षेत्रहरूमा पुग्न स्थानीय बासिन्दाहरूको सहजताका लागि पदमार्ग निर्माण गरिने बताइएको छ ।

यसैगरी, गोरखकाली रबर उद्योगसम्बन्धी प्राप्त विभिन्न अध्ययन प्रतिवेदनका सुझावहरू कार्यान्वयनको लागि पहलकदमी लिइने, ग्याजी तामाखानी अध्ययन गरी सञ्चालन तथा उत्खननका लागि आवश्यक पहल गरिने, विभिन्न किसिमका बहुमूल्य जडिबुटीको प्रशोधन केन्द्र स्थापनाका लागि पहल गरिने बताइएको छ ।

स्लेट खानी (मार्वल) पहिचान गरी उत्खनन तथा निकासीका लागि आवश्यक नीति निर्माण गर्न पहल गरिने प्रतिवद्धतापत्रमा उल्लेख छ ।