विदेशी मुद्रा सञ्चिति ३३ खर्ब नाघ्यो, २१ महिनाको वस्तु आयात धान्ने

News Summary

Generated by OK AI. Editorially reviewed.

चालु आर्थिक वर्षको सात महिनामा मुलुकको विदेशी मुद्रा सञ्चिति २३.३ प्रतिशतले बढेर ३३ खर्ब २ अर्ब रुपैयाँ पुगेको छ।
नेपाल राष्ट्र बैंकका अनुसार विदेशी मुद्रा सञ्चितिमा भारतीय मुद्राको अंश सबैभन्दा धेरै २१.५ प्रतिशत रहेको छ।
हालको विदेशी मुद्रा सञ्चितिले २१.३ महिनाको वस्तु आयात र १८.० महिनाको वस्तु तथा सेवा आयात धान्न पर्याप्त छ।

२७ फागुन, काठमाडौं । मुलुकसँग विदेशी मुद्रा सञ्चिति ३३ खर्ब नाघेको छ । चालु आर्थिक वर्षको ७ महिना अवधिमै यस्तो सञ्चिति २३.३ प्रतिशतले बढेको हो ।

असार मसान्तसम्म २६ खर्ब ७७ अर्ब रुपैयाँ बराबर रहेको सञ्चिति रकम माघ मसान्तसम्म आउँदा ३३ खर्ब २ अर्ब रुपैयाँ बराबर पुगेको हो । नेपाल राष्ट्र बैंकले आज चालु आर्थिक वर्षको सात महिना (साउनदेखि माघ मसान्तसम्म)को वित्तीय विवरण सार्वजनिक गरेको हो ।

विवरणअनुसार सोही सात महिना अवधिमा अमेरिकी डलरमा मुद्रा सञ्चिति १६.७ प्रतिशतले बढेर माघ मसान्तसम्म २२ अर्ब ७६ करोड डलर बराबर छ । कुल विदेशी विनिमय सञ्चितिमध्ये नेपाल राष्ट्र बैंकमा २९ खर्ब २६ अर्ब ९९ करोड छ भने बैंक तथा वित्तीय संस्था (नेपाल राष्ट्र बैंकबाहेक) सँग ३ खर्ब ७५ अर्ब ६७ करोड रुपैयाँ बराबर छ ।

हाल रहेको मुद्रा सञ्चितिमा भारतीय मुद्राको अंश २१.५ प्रतिशत रहेको राष्ट्र बैंकले जनाएको छ । हालको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले २१.३ महिनाको वस्तु आयात र १८.० महिनाको वस्तु तथा सेवा आयात धान्न पर्याप्त हुन्छ ।