सुकुमवासी बस्तीमा खानेपानीको पाइप फुटेपछि…(तस्वीर/भिडियो)

News Summary

Generated by OK AI. Editorially reviewed.

सरकारले १२ वैशाखबाट काठमाडौंका सुकुमवासी बस्तीमा बनेका संरचनाहरू हटाउन थालिएको छ।
थापाथलीस्थित बागमती नदी किनारमा संरचना भत्काउने क्रममा खानेपानीको पाइप फुटेपछि बालाजु, माइतीघर र एकान्तकुरामा पानी आपूर्ति अवरूद्ध भएको छ।
नेपाल प्रहरी, नगर प्रहरी र सशस्त्र प्रहरीको टोलीले सुकुमवासीलाई सुरक्षित स्थानमा स्थानान्तरण गरिरहेको छ।

१२ वैशाख, काठमाडौं । सरकारले आज (शनिबार) बाट काठमाडौंका सुकुमवासी बस्तीमा बनेका संरचनाहरू हटाउन थालेको छ ।

बिहानैबाट थापाथलीस्थित बागमती नदी किनारमा बनेका संरचनाहरू भत्काउन थालिएको हो । बस्तीका स्थानीयलाई सरकारले सुरक्षित स्थानमा स्थानान्तरण गर्न लागिएको बताएको छ । विशेषगरी शान्तिनगर, गैह्रीगाउँ, मनोहरा लगायतका क्षेत्रमा बसेका सुकुमवासीलाई आज र भोलि हटाउनेगरी सरकार लागिरहेको छ ।

यसैबीच थापाथलीस्थित बागमती नदी किनारमा रहेका सुकुमवासी बस्तीमा संरचना भत्काउने क्रममा खानेपानीको पाइप फुट्यो ।

सुकुमवासी बस्तीमा फुटेको खानेपानी पाइप मर्मतका लागि खानेपानी आपूर्ति बन्द गर्नुपर्ने भएका कारण बालाजु, माइतीघर र एकान्तकुरा क्षेत्रमा खोनेपानी आपूर्ति अवरूद्ध हुने भएको हो ।

काठमाडौं उपत्यका खानेपानी लिमिटेडका प्रवक्ता प्रकाशकुमार राईले फुटेको खानेपानी पाइप मर्मतका लागि तीन ठाउँमा बालाजु, माइतीघर र एकान्तकुरामा ‘भल्भ’ बन्द गर्न लागिएको जानकारी दिए ।

नेपाल प्रहरी, नगर प्रहरी र सशस्त्र प्रहरीको टोली स्थानन्तरणमा खटिएको छ ।

एकाएक सरकारले बस्ती हटाउने भएपछि सुरुवातमा आक्रोशित देखिएका सुकुमवासीहरू शुक्रबारबाट आफैं बस्ती खाली गर्न थालेका थिए ।

शनिबार बिहानसम्म थापाथलीका अधिकांश सुकुमवासी सरिसकेका थिए । प्रहरी र नगर प्रहरी दुवै उनीहरूलाई स्थानान्तरण गराउन लागेको थियो ।

बिहानबाट थापाथलीमा डोजर चलेको छ । गैह्रीगाउँ र मनोहरामा पनि धमाधम बस्ती खाली गराइँदैछ ।