भारतमा नेपाल प्रवर्द्धन गर्दै होटल व्यवसायी

News Summary

Generated by OK AI. Editorially reviewed.

होटल संघ नेपालले भारतको नयाँ दिल्लीमा भोलिदेखि तीन दिने नेपाल पर्यटन प्रवर्द्धन कार्यक्रम आयोजना गर्ने भएको छ।
हानका अध्यक्ष विनायक शाहको नेतृत्वमा ६५ सदस्यीय नेपाली होटल प्रतिनिधिमण्डल उक्त कार्यक्रममा सहभागी हुनेछ।
कार्यक्रममा नेपाली टोलीले भारतीय समकक्षीसँग बीटुबी भेटघाट गरी विशेष पर्यटन प्याकेज सार्वजनिक गर्ने बताइएको छ।

१४ वैशाख, काठमाडौं । होटल संघ नेपालले भोलिदेखि भारतको नयाँ दिल्लीमा नेपाल पर्यटन प्रवर्द्धन कार्यक्रम आयोजना गर्ने भएको छ । नेपाल र भारतका प्रमुख पर्यटन व्यवसायीलाई एउटै मञ्चमा ल्याउने उद्देश्यले आयोजना गरिएको यस कार्यक्रमले विशेषगरी गर्मीयाममा भारतीय पर्यटकको आगमन वृद्धि गर्ने लक्ष्य राखेको छ ।

हानका अध्यक्ष विनायक शाहको नेतृत्वमा ६५ सदस्यीय नेपाली होटल प्रतिनिधिमण्डल कार्यक्रममा सहभागी हुनेछ । प्रतिनिधिमण्डलले अप्रिल २८ मा ‘नेपाल-वैवाहिक गन्तव्य’ तथा अप्रिल २९ मा ‘नेपाल- तपाईंको नजिक, कल्पनाभन्दा उत्कृष्ट बिदा गन्तव्य’ शीर्षकका कार्यक्रमहरूमा भाग लिनेछ ।

यस प्रतिनिधिमण्डलमा हानका पदाधिकारी, बोर्ड सदस्य तथा देशभरका सदस्य होटल सहभागि छन् । नेपाल प्रवर्द्धनात्मक कार्यक्रमलाई दिल्लीस्थित नेपाली दूतावास र नेपाल पर्यटन बोर्डको सहयोग रहेको हानले बताएको छ ।

तीन दिने कार्यक्रम अवधिभर नेपाली टोलीले भारतीय समकक्षीसँग बीटुबी भेटघाट गर्नुका साथै ‘नेपाल पर्यटन साँझ’ मा पनि सहभागिता जनाउनेछ ।

कार्यक्रममार्फत हानका सदस्य होटलहरूले भारतीय परिवार, समूह पर्यटक, तीर्थयात्री, नवविवाहित जोडी, हनिमुन यात्रु, कर्पोरेट ग्राहक तथा प्रकृति, संस्कृति र साहसिक पर्यटनमा रुची राख्ने पर्यटकहरूलाई लक्षित विशेष प्याकेज सार्वजनिक गर्ने बताइएको छ ।

मध्यपूर्व संकटका कारण उडान अवरुद्ध हुनु र हवाई भाडा वृद्धि भएको सन्दर्भमा छिमेकी नेपालमा भारतीय पर्यटकको आगमन उल्लेखनीय रूपमा बढ्ने अपेक्षा होटल संघ नेपालले गरेको छ ।