सुरुङबाट बाढी छलेर तीन दिनपछि सेनाको ब्यारेकमा, भन्छन्– अझै अलपत्र छन् धेरै शव (भिडियो)

१३ भदौ, त्रिशुली (नुवाकोट) । भोटेकोशी नदीमा आएको विनाशकारी बाढीबाट उद्धार भएकाहरूलाई धमाधम उद्धार कार्य भइरहेको छ ।

नुवाकोटको त्रिशुलीस्थित नेपाली सेनाको सैन्य तालिम केन्द्रमा बाढीमा फसेका घाइतेहरू ल्याउने काम भइरहेको छ । केहीलाई हेलिकप्टरमार्फत सिधै काठमाडौं ल्याइएको छ भने सामान्य उपचार सोही केन्द्रमा भइरहेको छ ।

नुवाकोट विदुर नगरपालिका–१३ का धनबहादुर तामाङलाई आजै नेपाली सेनाले हेलिमार्फत उद्धार गरेको छ । उनी सुरुङभित्रै फसेका थिए । ‘एक्कासी बाढी आयो, त्यसपछि केही थाहा छैन,’ उनले भने । उनी सुरुङका चालक थिए । अहिले पनि सुरुङमा धेरै मान्छे रहेको उनले बताए ।

‘बाढी आएकै दिन म बाहिर निस्किएँ, रातभर क्याम्पमा बसेँ । खोला घटेपछि माथिको गाउँमा बास बस्न पुगेँ,’ उनले सुनाए, ‘हामी टनेलबाट बढीमा २० जना निस्किएका थियौं । आफैं निस्किएका हौं । अहिले पनि गाडीभित्रै शवहरू त्यतिकै छन् ।’

उनलाई अब चाहिँ बाँच्ने आशा रहेको उनले भावुक हुँदै सुनाए । ‘बाँचेकाहरूको उद्धार भइदिए हुन्थ्यो जस्तो लाग्छ,’ उनले भने ।

यही भदौ १० गते भोटेकोशीमा गएको विनाशकारी बाढीबाट प्रभावित रसुवा, नुवाकोट र धादिङमा उद्धार कार्य भइरहेको छ । राष्ट्रिय विपद् जोखिम न्युनीकरण तथा व्यवस्थापन प्राधिकरणका अनुसार, अहिले उपत्यकाका १३ वटा अस्पतालमा उपचार भइरहेको छ ।

नेपाल मेडिकल कलेज, वीरेन्द्र सैनिक अस्पताल, टिचिङ अस्पताल, मनमोहन अस्पताल, राष्ट्रिय ट्रमा सेन्टर, ग्रिनसिटी अस्पताल, वीर अस्पताल, नर्भिक अस्पताल, मनमैजु शुभम् अस्पताल, ग्राण्डी अस्पताल, हेम्स अस्पताल, प्रसूती गृह र एपीएफ अस्पतालमा उपचार भइरहेको छ ।

प्रधानमन्त्री तथा मन्त्रिपरिषद्को कार्यालयका अनुसार, त्रिशूली ३ ‘ए’ जलविद्युत् आयोजनामा फसेकाको उद्धार गर्न उत्खनन् जारी छ । अहिलेसम्म २० फिटभन्दा बढी उत्खनन भइसकेको रिर्पोटिङ भएको प्रधानमन्त्री तथा मन्त्रिपरिषद्को कार्यालयले जनाएको छ ।