रसुवा बाढी : यातायात महासंघ अन्तर्गतका १९१ गाडीमा क्षति, ३४४ जना बेपत्ता

News Summary

Generated by OK AI. Editorially reviewed.

रसुवाको भोटेकोशी नदीमा १० भदौमा आएको बाढीले नेपाल यातायात व्यवसायी राष्ट्रिय महासंघअन्तर्गतका ९ कम्पनीका १९१ सवारीसाधनमा क्षति पुर्‍याएको छ।
महासंघका महासचिव डेकनाथ गौतमका अनुसार उक्त बाढीमा चालक, सहचालक र यात्रु गरी ३४४ व्यक्ति बेपत्ता भएका छन्।
नेपाल अरनिको यातायात सेवा, नमस्ते पासाङ ल्हामु, नारायणी यातायात र अन्य कम्पनीका बस, ट्रक, कन्टेनर, जीप र माइक्रोबसमा क्षति पुगेको छ।

१ असोज, काठमाडौं । गत १० भदौमा रसुवाको भोटेकोशी नदीमा आएको विनाशकारी बाढीमा नेपाल यातायात व्यवसायी राष्ट्रिय महासघअन्तर्गत १९१ सवारीसाधनमा क्षति पुगेको छ ।

महासंघका महासचिव डेकनाथ गौतमका अनुसार भोटेकोशी बाढीले देशभरका नौ कम्पनीका १९१ सवारीसाधनमा क्षति पुग्दा उक्त सवारीसाधनका चालक, सहचालक र यात्रु गरी ३४४ व्यक्ति बेपत्ता भएका छन् ।

महासंघका अनुसार भोटेकोशी बाढीबाट नेपाल अरनिको यातायात सेवा प्रालिअन्तर्गत १९ बस, एक मिनिट्रक, दुई जीप, चार कन्टेनरमा क्षति पुग्दा ५० मजदुर बेपत्ता भएका छन् ।

यस्तै, नमस्ते पासाङ ल्हामु यातायात प्रालि बालाजुका १९ बस क्षति हुँदा २१ व्यक्ति बेपत्ता भएका छन् । भक्तपुर न्यू भिजन यातायात प्रालिका दुई कन्टेनरमा क्षति पुग्दा दुई चालक बेपत्ता भएका छन् ।

यसैगरी, हिमालयन यातायात कम्पनीका चार ट्रक, १६ कन्टेनर, एक सुमोमा क्षति पुग्दा १० चालक बेपत्ता भएका छन् । नेपाल टिपर तथा ट्रक व्यवसायी समितिअन्तर्गत सात टिपर, २२ कन्टेनर, २३ ट्रक र एक ट्रेलरमा क्षति हुँदा ४५ चालक बेपत्ता भएका छन् ।

नारायणी यातायात व्यवसायी कम्पनी प्रालिको ५९ ट्रक र कन्टेनरमा क्षति पुग्दा ७० जना बेपत्ता भएका छन् भने नेपाल माइक्रो कम्पनीका नौ माइक्रोबसमा क्षति पुगेको छ । यसैगरी, पृथ्वी राजमार्ग सञ्चालक कम्पनीको एक बसमा क्षति पुग्दा एक चालक र २२ यात्री बेपत्ता भएका छन् ।

यस्तै, धादिङ मण्डली यातायात प्रालिको एक बसमा क्षति पुग्दा एक चालक र २५ तीर्थयात्री बेपत्ता भएको महासंघका महासचिव गौतमले बताए ।