क्रान्तिशिखाको अभिव्यक्तिविरुद्ध भएको प्रदर्शनप्रति रास्वपा महामन्त्रीको आपत्ति

१ असोज, काठमाडौं । राष्ट्रिय स्वतन्त्र पार्टी(रास्वपा)ले संसदीय दलकी सचेतक क्रान्तिशिखा धितालको अभिव्यक्तिलाई लिएर सिंहदरबार गेटअगाडि भएको प्रदर्शनप्रति आपत्ति जनाएको छ ।

रास्वपाका महामन्त्री विपिनकुमार आचार्यले बिहीबारको प्रतिनिधिसभा बैठकमा बोल्दै विरोध जनाएका हुन् ।

महामन्त्री आचार्यले सुरुमा ‘म तिम्रो कुरासँग असहमत हुनसक्छु । तर, तिम्रो बोल्ने अधिकारको रक्षाका लागि अन्तिम साससम्म लडिरहनेछु’ भन्ने फ्रान्सेली लेखक, दार्शनिक र विचारक भोल्तेयरको भनाइ स्मरण गरे ।

भोल्तेयरको यो भनाइले अभिव्यक्तिको स्वतन्त्रताको लोकतान्त्रिक सहिष्णुताको सर्वोच्च मापदण्ड रहेको कुरालाई औंल्याउँछ । नेपालको संविधानले पनि अभिव्यक्तिको स्वतन्त्रतालाई मौलिक हक मानेको छ ।

‘फरक विचार राखेकै कारण सांसदहरूविरुद्ध खुल्लमखुला सिंहदरबारकै गेटअगाडि लतार्ने, घिसार्ने, घर जलाउने र रक्तपात मच्चाउनेजस्ता प्रथम दृष्टिमै खारेजयोग्य धम्की आउनु अभिव्यक्ति स्वतन्त्रतामाथिको ठाडो प्रहार हो’, रास्वपाका महामन्त्री आचार्यले भने ।

महामन्त्री आचार्यले रास्वपाकी सचेतक धितालको नाम लिएनन् । तर, केही दिनअगाडि धितालको अभिव्यक्तिलाई लिएर केही व्यक्तिहरूले सिंहदरबार गेट अगाडि प्रदर्शन गरेका थिए ।

भदौ २३ गते पुरानो संसद् भवनको परिसरमा जेनजी शहीद प्रथम स्मृति दिवस आयोजना गरिएको थियो ।

उक्त कार्यक्रमलाई लिएर धितालले टिप्पणी गरेकी थिइन् । शहीद परिवार र आन्दोलनका घाइतेको पीडा सम्बोधन नगरी भव्य मञ्च तथा धर्मगुरुको सहभागितासहित कार्यक्रम गर्नुको औचित्यमाथि प्रश्न उठाएकी थिइन् ।

जेनजीको आवाज उठाउने र सरकारका काममाथि प्रश्न गर्नेहरूले पनि कार्यक्रमको स्वरूपबारे हस्तक्षेप गर्न नसकेको भन्दै उनले असन्तुष्टि जनाएकी थिइन् ।

यसप्रति प्रश्न उठाएर केही व्यक्तिले सिंहदरबारको गेटअगाडि प्रदर्शन गरेका हुन् ।

यो पनि पढ्नुहोस

रास्वपा सचेतकको अभिव्यक्तिमाथि जेनजी शहीद परिवारको आपत्ति, मागे जवाफ

यो विषय प्रतिनिधिसभामा उठाउँदै रास्वपाका महामन्त्री आचार्यले सांसदलाई बोलेकै कारण धम्की दिनेहरूउपर कारबाहीको माग गरे ।

‘यी अतिवादी धम्की दिनेहरूलाई कानुनी कारबाहीको दायरामा ल्याइयोस् भनेर मैले गृहमन्त्रीज्यू र प्रधानमन्त्री कार्यालयलाई आग्रह गरिसकेको छु’ महामन्त्री आचार्यले भने, ‘म चाहन्छु– यस सम्मानित संसद्ले तथ्यमा टेकेर बोल्ने आफ्ना हरेक सांसदलाई साहस देओस् र भनोस्, बोल्न नडराउनू हामी तिमीसँगै छौं ।’