पहिलो दिनमै ‘रामायण’को कमाइ साढे ७७ करोड माथि, ‘आदिपुरुष’को रेकर्ड भने तोड्न सकेन

रणवीर कपूर स्टारर फिल्म ‘रामायण’ले प्रदर्शनको पहिलो दिनमै विश्वभरबाट ७७ करोड ५० लाख भारतीय रुपैयाँ ग्रस कलेक्सन गरेको छ ।

सैकनिल्कको प्रारम्भिक आँकडाअनुसार फिल्मले भारतमा मात्रै ६४ करोड ८५ लाख भारुको नेट कमाइ गरेको हो ।

यो कमाइसँगै ‘रामायण’ सन् २०२६ मा सर्वाधिक ओपनिङ गर्ने हिन्दी फिल्ममध्ये दोस्रो स्थानमा पुगेको छ ।

यद्यपि, पहिलो दिनको कमाइका हिसाबले फिल्मले प्रभास स्टारर ‘आदिपुरुष’को रेकर्ड भने तोड्न सकेन । सन् २०२३ मा प्रदर्शन भएको ‘आदिपुरुष’ले पहिलो दिन सबै भाषामा ८६ करोड ७५ लाख भारु ग्रस कमाइ गरेको थियो ।

२५ हजारभन्दा बढी शोमा प्रदर्शन, हिन्दी संस्करणको दबदबा

फिल्म देशभर २५ हजार २०० शोमा प्रदर्शन भएको थियो । यसको कमाइमा हिन्दी संस्करणको सबैभन्दा ठूलो योगदान देखिएको छ ।

हिन्दी संस्करणले २० हजार ६७८ शोबाट ४७ करोड ५० लाख भारु नेट कलेक्सन गरेको छ ।

त्यस्तै, कन्नड संस्करणबाट ७ करोड २५ लाख, तेलुगुबाट ६ करोड, तमिलबाट २ करोड ६० लाख र मलयालमबाट १ करोड ५० लाख भारु कमाइ भएको छ ।

विदेशी बजारबाट पनि फिल्मले २० देखि ४० करोड भारुसम्म कमाउने अनुमान गरिएको छ । यो अनुमान पूरा भए फिल्मको विश्वव्यापी कमाइ १०० करोड भारु नाघ्नेछ ।

‘पठान’ र ‘एनिमल’लाई उछिन्यो, ‘आदिपुरुष’भन्दा पछि

पहिलो दिनको कमाइका आधारमा ‘रामायण’ले शाहरुख खानको ‘पठान’ र रणवीर कपूरकै फिल्म ‘एनिमल’को ओपनिङ कलेक्सनलाई पछाडि पारेको छ ।

तर, सन् २०२६ कै सबैभन्दा ठूलो ओपनिङ गर्ने फिल्म ‘धुरन्धर : द रिभेन्ज’को रेकर्ड भने तोड्न सकेन । उक्त फिल्मले पहिलो दिन १०२ करोड ५५ लाख भारु नेट कमाइ गरेको थियो ।

महँगो टिकट र चाडपर्वको तयारीले प्रभावित भयो कमाइ ?

फिल्मको पहिलो दिनको कमाइ अपेक्षाभन्दा केही कम हुनुमा विभिन्न कारण रहेको व्यापार विश्लेषकहरूको भनाइ छ । बिहीबार प्रदर्शनमा आएको फिल्म हेर्न दीपावलीको तयारी र यात्राका कारण धेरै परिवार पहिलो दिन नै हलसम्म पुग्न सकेनन् ।

त्यसैगरी, महँगो टिकट मूल्य, प्रचारप्रसारको सीमितता र यसअघि ‘आदिपुरुष’ले दर्शकमा पारेको नकारात्मक प्रभावले पनि केही दर्शकलाई फिल्मप्रति सुरुवातमै सतर्क बनाएको विश्लेषण गरिएको छ ।

रणवीर र यशको अभिनयको चर्चा, दृश्य प्रभावको प्रशंसा

फिल्म प्रदर्शनमा आएसँगै यसको दृश्य प्रभाव (भीएफएक्स) र कलाकारको अभिनयबारे दर्शक तथा समीक्षकबाट मिश्रित प्रतिक्रिया आइरहेको छ । विशेषगरी भगवान् रामको भूमिकामा रणवीर कपूर र रावणको भूमिकामा देखिएका यशको अभिनयले चर्चा पाएको छ ।

फिल्ममा साई पल्लवी सीताको भूमिकामा र रवि दुबे लक्ष्मणको भूमिकामा देखिएका छन् । पौराणिक कथालाई ठूलो पर्दामा प्रस्तुत गरिएको यसको दृश्य प्रभावलाई पनि दर्शकले प्रशंसा गरेका छन् ।

‘रामायण’लाई भारतीय चलचित्र इतिहासकै महँगो परियोजनामध्ये एक मानिएको छ । विभिन्न सञ्चारमाध्यमका रिपोर्टअनुसार फिल्मका दुवै भागको कुल बजेट करिब ४ हजार करोड भारु रहेको छ ।

ठूलो बजेट, चर्चित कलाकार र पौराणिक कथामा आधारित भएकाले प्रदर्शनअघि नै फिल्मप्रति दर्शकको उत्सुकता उच्च थियो । अब पहिलो दिनको कमाइपछि फिल्मले आगामी दिनमा कस्तो व्यापार गर्छ भन्ने चासो बढेको छ ।