‘रामायण’ को ४ हजार करोड बजेटमाथि बहस

फिल्ममेकर राम गोपाल वर्माले फेरि एकपटक रणवीर कपूर अभिनीत फिल्म ‘रामायण’ को प्रशंसा गरेका छन् । उनले आफ्नी आमाले समेत टिकट किनेर अरूलाई फिल्म देखाइरहेको बताएका छन् । यससँगै उनले फिल्मका निर्माता नमित मल्होत्राको व्यावसायिक रणनीतिको पनि प्रशंसा गरेका छन् ।

राम गोपाल वर्माले पछिल्लो समय रणवीर कपूर अभिनीत फिल्म ‘रामायण’ को खुलेर प्रशंसा गर्ने गरेका छन् । प्रदर्शनमा आएको १० दिनमै फिल्मले विश्वभरबाट १२०० करोड भारुभन्दा बढी कमाइ गरेको छ । फिल्मको यो सफलताबीच वर्माले निर्माता नमित मल्होत्राको व्यावसायिक रणनीतिको समर्थन गरेका छन् ।

यति मात्र होइन, उनले फिल्मको दोस्रो भागको कमाइबारे पनि ठूलो अनुमान गरेका छन् । उनका अनुसार ‘रामायण २’ ले पहिलो भागको तुलनामा १० गुणा बढी कमाइ गर्न सक्छ ।

राम गोपाल वर्माले सामाजिक सञ्जाल एक्समा लामो पोस्ट लेख्दै फिल्मको बजेट, कमाइ र निर्माणपछाडिको व्यावसायिक रणनीतिबारे आफ्नो धारणा सार्वजनिक गरेका छन् । उनले फिल्मको अहिलेको कमाइलाई हेर्दा नमित मल्होत्राले पहिलो भागबाटै दुवै भागको निर्माण लागत उठाउन सक्ने बताएका छन् ।

आमाले अरूलाई टिकट किनेर फिल्म देखाइन्

राम गोपाल वर्माले आफ्नी आमासँग जोडिएको एउटा प्रसंग सुनाउँदै पोस्ट सुरु गरेका छन् । उनले लेखेका छन्, ‘मेरी आमाले मेरा उत्कृष्ट फिल्मका लागि समेत यस्तो गर्नुभएन । तर नमित मल्होत्राको रामायणका लागि उहाँले टिकट किनेर घरमा काम गर्ने मानिस, सुरक्षागार्ड र अपार्टमेन्टमा बस्ने अरू मानिसलाई फिल्म देखाइरहनुभएको छ ।’

उनका अनुसार फिल्मप्रति दर्शकको उत्साह निकै ठूलो छ । यही कारण फिल्मले बक्स अफिसमा नयाँ रेकर्ड बनाइरहेको छ । उनी यसलाई भारतीय सिनेमाको सबैभन्दा ठूलो हिट बन्ने दिशामा अघि बढिरहेको फिल्म मान्छन् ।

४ हजार करोडको बजेटबारे के भने ?

फिल्मको बजेटलाई लिएर भइरहेको आलोचनाबारे पनि राम गोपाल वर्माले आफ्नो धारणा राखेका छन् । केहीले ‘रामायण’ का दुवै भाग निर्माण गर्न ४ हजार करोड भारु खर्च भएको दाबी गरिरहेका छन् । अर्थात् प्रत्येक भागको बजेट २ हजार करोड भारु रहेको बताइएको छ ।

तर वर्माका अनुसार पहिलो भाग निर्माण गर्न ८०० करोड भारुभन्दा कम खर्च भएको छ । उनले निर्माणसँग जोडिएका आपसी लाभका सम्झौता, अन्तर्राष्ट्रिय कर छुट र सरकारी अनुदानजस्ता सुविधाले फिल्मको वास्तविक लागत अझ घटाउने बताएका छन् ।

उनका अनुसार फिल्म हेर्ने अनुभवी फिल्ममेकरले यसको निर्माणमा ८०० करोड भारुभन्दा बढी खर्च नभएको अनुमान गर्न सक्छन् ।

उनले दुवै भागको बजेट समान हुन नसक्ने पनि बताएका छन् । उनका अनुसार ‘रामायण’ का दुवै भाग एउटै फिल्मका दुई हिस्सा हुन् । उनले फिल्मको मध्यभागअघिको दृश्य र त्यसपछिको दृश्य निर्माणमा हुने खर्च समान नहुने उदाहरण दिएका छन् । कतिपय फिल्ममा त क्लाइमेक्सका लागि मात्रै कुल बजेटको ५० प्रतिशतसम्म खर्च हुने गरेको उनको भनाइ छ ।

‘रामायण’ को संसार निर्माणमा ठूलो लगानी

वर्माका अनुसार फिल्मको बजेटको ठूलो हिस्सा ‘रामायण’ को संसार निर्माण गर्न खर्च गरिएको छ । तर यो लगानी पहिलो भागका लागि मात्रै नभई दोस्रो भाग, गेमिङ र भविष्यमा बन्ने अन्य परियोजनामा समेत उपयोग हुनेछ ।

अर्थात् अहिले गरिएको खर्च भविष्यमा पनि आम्दानी दिन सक्ने सम्पत्तिका रूपमा रहने उनको तर्क छ ।

उनले बलिउडका धेरै फिल्ममेकर, व्यापार विश्लेषक र आफूलाई फिल्म क्षेत्रको जानकार बताउने मानिसले यो व्यावसायिक रणनीति बुझ्न नसक्ने बताएका छन् ।

वर्माका अनुसार फिल्मले अहिले गरिरहेको कमाइलाई हेर्दा नमित मल्होत्राले पहिलो भागबाटै पहिलो फिल्मको लागत मात्रै होइन, सम्भवतः दुवै भागको निर्माण खर्चसमेत उठाउन सक्छन् । त्यसपछि पहिलो भागबाट हुने गैर-थिएटर आम्दानी र दोस्रो भागबाट प्राप्त हुने सम्पूर्ण कमाइ अलग हुनेछ ।

नमित मल्होत्राबारे ठूलो भविष्यवाणी

राम गोपाल वर्माले व्यङ्ग्यात्मक शैलीमा यति ठूलो कमाइपछि नमित मल्होत्राले आफ्नै पुष्पक विमान बनाउन सक्ने र भारतका ठूला निर्माण कम्पनीले समेत अहिलेसम्म नगरेका परियोजनामा लगानी गर्न सक्ने बताएका छन् ।

उनले भविष्यमा नमितले हलिउडका ठूला स्टुडियोलाई समेत पछाडि पार्न सक्ने अनुमान गरेका छन् ।

वाल्मीकि र तुलसीदासको प्रसंग उल्लेख गर्दै वर्माले सन् १९१३ मे ३ मा प्रदर्शन भएको फिल्म ‘राजा हरिश्चन्द्र’ देखि अहिलेसम्मको इतिहासमा नमित सबैभन्दा ठूलो फिल्ममेकर बन्ने दिशामा रहेको बताएका छन् ।

आफ्नो दाबीप्रति कसैलाई शंका लागे तथ्यांकको हिसाब गरेर हेर्नसमेत उनले चुनौती दिएका छन् ।