+
+
Shares

त्रिवि शिक्षण अस्पतालमा विस्तारित सेवामार्फत अब तीन दिनभित्रै शल्यक्रिया

यस सेवामार्फत बिरामीले वरिष्ठ विशेषज्ञ चिकित्सकसँग स्वास्थ्य परीक्षण तथा परामर्श लिनुका साथै आवश्यक प्रयोगशाला परीक्षण, रेडियोलोजिकल जाँच र शल्यक्रियासमेत गराउन सक्नेछन् ।

अनलाइनखबर अनलाइनखबर
२०८३ मंसिर २ गते १८:१४

२ मंसिर, काठमाडौं । त्रिभुवन विश्वविद्यालय शिक्षण अस्पताल (टिचिङ) ले विस्तारित स्वास्थ्य सेवा (ईएचएस) विस्तार गरेको छ ।  अस्पतालले सोमबारदेखि शुक्रबारसम्म हरेक दिन अपराह्न ४ बजेदेखि यो सेवा सञ्चालन गर्दै आएको छ ।

यस सेवामार्फत बिरामीले वरिष्ठ विशेषज्ञ चिकित्सकसँग स्वास्थ्य परीक्षण तथा परामर्श लिनुका साथै आवश्यक प्रयोगशाला परीक्षण, रेडियोलोजिकल जाँच र शल्यक्रियासमेत गराउन सक्नेछन् ।

अस्पतालका सहायक सूचना अधिकारी कालीप्रसाद रोस्याराका अनुसार विस्तारित स्वास्थ्य सेवा छुट्टै भवनबाट सञ्चालन भइरहेको छ । बिरामीको दर्ता, टिकट, बिलिङ तथा प्रयोगशाला र रेडियोलोजिकल परीक्षणका लागि छुट्टाछुट्टै काउन्टरको व्यवस्था गरिएको छ ।

यसले सेवा प्रवाहलाई व्यवस्थित बनाउनुका साथै बिरामीको प्रतीक्षा समय घटाउन सहयोग पुग्ने अस्पतालको अपेक्षा छ ।

यो सेवाको एउटा महत्त्वपूर्ण पक्ष शल्यक्रिया पनि हो । चिकित्सकीय रूपमा शल्यक्रियाका लागि उपयुक्त ठहरिएका र शल्यक्रियापूर्व गरिने एनेस्थेसिया परीक्षण (पीएसी) पूरा गरेका बिरामीको तीन कार्यदिनभित्र शल्यक्रिया गर्न सकिने व्यवस्था गरिएको रोस्याराले जानकारी दिए ।

यस्तो शल्यक्रिया वरिष्ठ विशेषज्ञ चिकित्सकको प्रत्यक्ष निगरानीमा हुनेछ ।

नियमित कार्यालय समयमा अस्पताल आउन नसक्ने कर्मचारी, व्यवसायी तथा अन्य पेसाकर्मीलाई यो सेवाले विशेष सुविधा पुग्ने अस्पतालको विश्वास छ ।

बिरामीले छुट्टै सेवा प्रणालीमार्फत विशेषज्ञ चिकित्सकको परामर्श र आवश्यक स्वास्थ्य परीक्षणसमेत सहज रूपमा गराउन सक्नेछन् ।

हाल आइतबारबाहेक सातामा पाँच दिन सञ्चालन भइरहेको यो सेवा आगामी दिनमा आइतबारसमेत विस्तार गर्ने अस्पतालको तयारी छ ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?