गौतमबुद्ध अन्तर्राष्ट्रिय विमानस्थलमा भएको त्रुटि छानबिन गर्ने उपसमिति संयोजकमा कांग्रेस सांसद खाँण

News Summary

Generated by OK AI. Editorially reviewed.

गौतमबुद्ध अन्तर्राष्ट्रिय विमानस्थलको निर्माणमा भएका त्रुटि र भ्रष्टाचारको छानबिन गर्न नयाँ उपसमिति गठन गरिएको छ।
कांग्रेस सांसद मञ्जु खाँणलाई उक्त उपसमितिको संयोजक बनाइएको छ, जसले यसअघि नेतृत्व गरिरहेका एमाले सांसद योगेश भट्टराईको स्थान लिएका छन्।
भट्टराईले आफ्नो जिम्मेवारीबाट हट्ने घोषणा गरेपछि, नयाँ संयोजकको रूपमा मञ्जु खाँण चयन भएकी हुन्।

४ जेठ, बुटवल । गौतमबुद्ध अन्तर्राष्ट्रिय विमानस्थलको निर्माणका क्रममा भएका त्रुटि, अनियमितता र भ्रष्टाचार छानबिन गर्न गठित प्रतिनिधिसभाअन्तर्गतको सार्वजनिक लेखा समितिको उपसमिति संयोजकमा कांग्रेस सांसद मञ्जु खाँण चयन भएकी छन् ।

आइतबार बसेको बैठकले खाँणलाई संयोजक चयन गर्ने निर्णय लिएको समितिका सचिव तथा संसद् सचिवालयका प्रवक्ता एकराम गिरीले जानकारी दिए ।

यसअघि उक्त उपसमितिको संयोजक सरकारको नेतृत्व गरिरहेको एमालेका सांसद तथा पूर्वसंस्कृति, पर्यटन तथा नागरिक उड्डयनमन्त्री योगेश भट्टराई थिए । उनी नेतृत्वको उपसिमितिले रूपन्देहीको भैरहवामा रहेको गौतम बुद्ध अन्तर्राष्ट्रिय विमानस्थल निर्माणका क्रममा भ्रष्टाचार र अनियमिततामाथि छानबिन नै नगरी प्रारम्भिक प्रतिवेदन तयार पारेपछि प्रश्न उठेको थियो ।

उपसमिति संयोजकका रूपमा आफूमाथि प्रश्न उठेपछि भट्टराईले आफू उक्त जिम्मेवारीमा नबस्ने घोषणा गरेका थिए ।