गुस्ताभ क्लिम्टको एउटा कलाकृति साढे ३३ अर्बमा विक्री

News Summary

Generated by OK AI. Editorially reviewed.

गुस्ताभ क्लिम्टको \'पोर्ट्रेट अफ एलिजाबेथ लेडेरर\' २३ करोड ६४ लाख डलरमा न्युयोर्कको सोथबीजमा विक्री भएको छ।

गुस्ताभ क्लिम्टले बनाएको एउटा पोर्ट्रेट आधुनिक कलामा कीर्तिमानी मूल्यमा विक्री भएको छ । हालै उनको एउटा कलाकृति २३ करोड ६४ लाख डलरमा विक्री भयो। कलाकार क्लिम्टको ‘पोर्ट्रेट अफ एलिजाबेथ लेडेरर’ न्युयोर्कको सोथबीजमा यति उच्च मूल्यमा विक्री भई कीर्तिमान बनाएको हो ।

यो चित्रकलाको इतिहास महत्त्वपूर्ण छ । किनकि यो पोर्ट्रेटमा एलिजाबेथ लेडेरर नामकी यहुदी महिलाको चित्र छ । दोस्रो विश्वयुद्धको समयमा यसै चित्रकलाले नाजीहरूबाट उनको जीवन बचाएको थियो ।

नाजीहरूले यहुदीहरूलाई दुःख दिइरहेका बेला एलिजाबेथले एउटा झूटो कथा बनाएकी थिइन् । उनले यहुदीहरूलाई आफू यहुदी नभई क्लिम्टकी छोरी भएको बताएकी थिइन् । त्यस कुरा प्रमाणित गर्न उनले आफ्ना नाजी अधिकारी नातेदारको सहयोगमा क्लिम्टकी सन्तान भएको प्रमाणित गर्ने कागजात बनाएकी थिइन् । त्यसैकारणले सन् १९४४ मा प्राकृतिक मृत्यु नहुँदासम्म उनी सुरक्षित रहन पाएकी थिइन् ।

६ फिट अग्लो उक्त चित्रमा एलिजाबेथले राज खलकले लगाउने लुगा लगाएकी छिन् । यस कलाकृतिको विक्रीपछि सन् २०२२ मा एन्डी वारहोलले बनाएको मर्लिन मुनरोको पोर्ट्रेटको कीर्तिमान तोडेको छ । उक्त चित्र १९ करोड ५० लाख डलरमा विक्री भएको थियो ।

त्यस्तै यस कलाकृतिको विक्रीलाई आधुनिक कला इतिहासकै सबैभन्दा महँगो विक्री भएको समेत भनिएको छ ।