इन्डिगोका सयभन्दा बढी उडान रद्द, कारण यस्तो

News Summary

Generated by OK AI. Editorially reviewed.

भारतमा इन्डिगो एयरलाइन्सका १५० उडानहरू रद्द भएका छन् भने दर्जनौं उडानमा ढिलाइ भएको छ।
नयाँ सरकारी नियमले पाइलटहरूको कामको समयतालिका जटिल बनेको र एयरलाइन्सले पाइलटसँग जुध्नु परेको छ।
कोलकाता र हैदराबाद एयरपोर्टमा पनि इन्डिगोका धेरै उडानहरू रद्द र ढिलो भएका छन्।

१८ मंसिर काठमाडौं । भारतमा बुधबार इन्डिगो एयरलाइन्सका दर्जनौं उडानहरू रद्द भएका छन् । उडान रद्द र ढिलाइ हुँदा हजारौं यात्री विमानस्थलमा घण्टौंसम्म रोकिनुपरेको छ ।

समाचार एजेन्सी रोयटर्सका अनुसार बुधबार भारतको सबैभन्दा ठूलो विमान कम्पनीमध्येको एक इन्डिगोका १५० उडानहरू रद्द भएका थिए भने दर्जनौं उडानहरूमा ढिलाइ भएको थियो ।

रोयटर्सले स्रोत र इन्डिगोका एक पाइलटको हवाला दिँदै भनेको छ, ‘थकानको सामना गर्न र पाइलटका लागि आरामको समय बढाउनका लागि १ जुलाई र १ नोभेम्बरमा लागू गरिएको नयाँ सरकारी नियमपछि एयरलाइन्स पाइलटहरूको कमीसँग जुध्नु परेको छ । जसका कारण रोस्टर प्रबन्धन ( कामको समयतालिका) जटिल भएको छ ।’

अंग्रेजी अखबार द हिन्दुले अधिकारीहरूको हवाला दिँदै बुधबार राति १२ बजेदेखि बेलुकी ८ बजेको बीचमा कोलकाता एयरपोर्टमा इन्डिगोका १५ उडानहरू रद्द भएका र १३० भन्दा बढी उडान ढिलो गरी उडेका बताएको छ ।

हैदराबाद एयरपोर्टबाट पनि उडानहरू रद्द र ढिलाइ भएको गुनासो आएको बीबीसीले जनाएको छ । बीबीसीकाअनुसार हैदराबाद एयरपोर्टका तर्फबाट एक्समार्फत् पछिल्लो परिस्थितिबारे जानकारी दिएको थियो ।