वर्षातको मौसममा घरको हेरचाह गर्ने १० उपाय

वर्षातको मौसम धेरैलाई मनपर्न सक्छ, तर वर्षातको मौसममा घरलाई विशेष हेरचाह चाहिन्छ, किनकि वर्षमा पानीका थोपाहरूले घरमा विभिन्न तरिकाले आक्रमण गर्न सक्छन् । त्यसैले वर्षामा घरको हेरचाहसँग सम्बन्धित केही कुराहरूमा विशेष ध्यान दिनुपर्ने हुन्छ ।

१.कपडाको हेरचाह

वर्षामा हामी मात्र होइन, हाम्रा कपडाहरू पनि भिज्छन् र सबैभन्दा नराम्रो कुरा के हो भने भिजेपछि तिनीहरू छिटो सुक्दैनन् । त्यसैले धेरैजसो मानिसहरू वर्षामा बेड कभर, पर्दा, तौलिया आदि धुनबाट बच्न खोज्छन् । तर यो कुनै विकल्प होइन, किनकि केही समयपछि तिनीहरूबाट दुर्गन्ध आउन थाल्छ ।

त्यसैले कम कपडा धोए पनि, जुन जरुरी छन् तिनीहरूको सफाइबाट बच्न सकिँदैन । घरमा धुँदा नसुकेर कपडाहरू बिग्रिन्छन् जस्तो लाग्छ भने ड्राई क्लिनिङ गराउन सकिन्छ ।

२.घरलाई सुगन्धित बनाउने

वर्षाको मौसममा विभिन्न प्रकारका ब्याक्टेरियाहरू बढ्नका लागि उपयुक्त मौसम हो, त्यसैले घरको सफाइ नियमित रूपमा गर्नुपर्छ । सफाइ गरेपछि हरेक कोठामा सुगन्धित फूलहरूको एउटा सानो बाउल राख्न सकिन्छ । जसमा आफ्नो मनपर्ने एसेंशियल तेलका केही थोपा पनि हाल्न सकिन्छ यसले घरबाट मीठो र ताजा सुगन्ध आइरहन्छ ।

३.बिरुवाहरूलाई घरबाहिर राख्ने

यो मौसममा इन्डोर बिरुवाहरूको हेरचाह पनि निकै जरुरी हुन्छ । वर्षाको मौसममा घामको प्रकाश पर्याप्त नआउने हुँदा बिरुवाहरूलाई केही समयका लागि बाहिर राख्नु नै बुद्धिमानी हुन्छ ।

वर्षाको मौसममा बिरुवाका पातहरूमा विभिन्न प्रकारका किराहरू बढ्न थाल्छन्, त्यसैले तिनीहरूलाई घरभित्र राख्दा त्यो घरमा पनि फैलन सक्छन् । त्यसैले सम्भव भए इनडोर बिरूवाहरूलाई वर्षाको बेला बाल्कनीमा राख्नुपर्छ । अत्यधिक वर्षा भएमा तिनीहरूलाई भिज्नबाट जोगाउने व्यवस्था पनि गर्नुपर्छ ।

४.कार्पेटको हेरचाह

वर्षाको मौसममा कार्पेटको हेरचाह निकै खर्चिलो हुन्छ । कार्पेटले ओस र धुलो सोस्छ, जसका कारण तिनीहरूबाट अनौठो किसिमको दुर्गन्ध आउन थाल्छ । यसलाई रोक्नका लागि तिनीहरूलाई दैनिक भ्याक्युम क्लिन गर्नुपर्छ । साथै सम्भव छ भने वर्षाको समयमा कार्पेटलाई हटाएर वर्षापछि रख्न पनि सकिन्छ ।

५.बिजुलीका उपकरणहरूलाई वर्षाअघि नै ठीक गराउने

वर्षामा ठूलो पानी र हावाहुरीले विद्युत् प्रवाहमा उतारचढाव ल्याउँछ । यो समयमा ग्याजेटहरूमा यसको खराब प्रभाव नपरोस भनेर ध्यान दिनुपर्छ । यसका लागि वर्षा सुरु हुनुअघि नै इलेक्ट्रीशियन बोलाएर वायरिङ जाँच गराउनुपर्छ । कतै तारहरू भिजिरहेका छन् भने तिनलाई बदलाउनुपर्छ, ताकि शर्ट सर्किटको डर नहोस् । स्विच बोर्ड नजिक लिकेज छ भने बेवास्ता गर्नुहुँदैन मर्मत गरिहाल्नुपर्छ ।

६.किताबहरूको विशेष ख्याल राख्नुपर्छ

यदि घरमा किताबहरूको ठूलो संग्रह छ भने तिनीहरूलाई पनि वर्षाको प्रभावबाट बचाउनुपर्छ । किताब बिग्रिएपछि तिनलाई पहिलेजस्तो बनाउन सकिँदैन । त्यसैले किताबहरूको र्‍याकको हरेक कुनामा नेफ्थालिन बल र सिलिका जेल पाउच राख्नुपर्छ, यसले ओससँगै वर्षाको समयमा लाग्ने किराहरूबाट पनि किताबहरूलाई बचाउन सकिन्छ ।

७.वर्षाअघि नै लिकेज जाँच गराउने

वर्षा सुरु हुनुअघि नै पूरै घरको लिकेज जाँच गराउनुपर्छ । किनकि वर्षाको बेला कतैबाट लिकेज भइरहेको छ भने त्यसलाई ठीक गर्न निकै गाह्रो हुन्छ । लिकेज ठूलो भयो भने त्यसलाई रोक्न लगभग असम्भव हुन्छ । त्यसैले वर्षाअघि नै त्यसलाई मर्मत गर्नु राम्रो हुन्छ ।

८.घरलाई हावा चल्ने बनाउनु जरुरी छ

वर्षाको समयमा हावामा ओस निकै बढी हुन्छ । यसको मतलब यदि ओसलाई व्यवस्थापन गर्ने उपाय खोजिएन भने घरबाट ढुसी जस्तो दुर्गन्ध आउन थाल्छ । त्यसो नहोस् भनेर भेन्टिलेसन निकै जरुरी हुन्छ । सम्भव भएसम्म झ्यालहरू खोल्नुपर्छ ताकि हावा पास भइरहोस् । क्रस भेन्टिलेसनले घरबाट ओस्युक्त दुर्गन्ध आउन दिँदैन ।

९.घरको रिनोभेसन नगराउने

वर्षाको समयमा वा वर्षामा घरको रिनोभेसन गर्नबाट बच्नु नै बुद्धिमानी हुन्छ । यो समयमा रिनोभेसन गर्नु भनेको पैसा खेर फाल्नुजस्तै हो । घरमा कुनै पनि किसिमको तोडफोड सुक्खा मौसममा गराउनुपर्छ ताकि नयाँ काम सुक्न पर्याप्त समय मिलोस् ।

१०.फर्निचरको हेरचाह यसरी गर्ने

हामी सबैलाई थाहा छ, काठले नमी सोस्छ र फुल्छ । खासगरी वर्षाको मौसममा काठका फर्निचरहरू अलिकति फुलेर जान्छन् । त्यसो नहोस् भनेर फर्निचरको नियमित वाक्सिङ जरुरी छ । यसले फर्निचरलाई ओसबाट बचाउँछ र कीरा पनि लाग्दैन । वर्षाको समयमा यदि ढोका, ड्रअर र झ्यालहरू फुलेर बन्द भइरहेको छैन भने स्यान्डपेपरले अलिकति रगड्नुपर्छ ।