सशस्त्रका कमान्डरको अनुभव : ठूलो पहाड पन्छाएर उद्धार गर्‍यौं, टनेलमा चुनौती कम छ

हामी अहिले अपर त्रिशुली थ्री ए मा उद्धारका लागि खटिरहेका छौं । हामी डिजास्टर म्यानेजमेन्ट टिमको पनि स्पेसल सीएसआर टोली हो । यो टोलीका जम्मा अठार जना लिएर आएको थिएँ । हामी नेपाल आर्मीको सहकार्यमा सँगै बसेर काम गरिराखेका छौं ।

सुरुमा हामी रेकी गर्न आएका थियौं । बाढी आएको भोलिपल्ट ११ भदौमा हामीले यो क्षेत्रमा रेकीको काम गर्‍यौं । त्यसयता हाम्रो (सशस्त्र प्रहरी) र आर्मीको टोली यत्तै छ । संयुक्त रूपमा काम गरिराखेका छौं ।

अहिलेसम्म दुई जनाको जीवितै उद्धार भइसकेको छ । अरू खोजी हुँदैछ । हामीले भेट्दा उहाँहरू कन्सियस (चेत) नै हुनुहुन्थ्यो । आँखा खोलेर हेर्न सक्ने नै हुनुहुन्थ्यो । उहाँहरूले चिच्याएको हामीले सुनेर थप सक्रियताका साथ सजग भएर उद्धारमा खटियौं ।

त्यहाँ अरू पनि हुनुहुन्छ होला भन्ने आश गरेका छौं । भित्र अक्सिजनको कमी हुने भएकाले अक्सिजन सिलिन्डर भित्र पसाउने कोशिस भइरहेको छ । भित्र अरू थप छन्/छैनन् भन्ने कन्ट्याक्ट हुन सकेको त छैन । आवाज कम भएर पनि होला ।

अहिले त टनेल त्यस्तो धेरै चुनौतीपूर्ण छैन । पहिला यहाँसम्म आउनै हामीलाई समस्या परेको थियो । टेनेलको मुखमा एउटा पहाडै आएर खसेको थियो । त्यो काटेर फाल्न निकै समय लाग्यो ।

हाम्रो विशेष योगदान चाहिँ फलाम काट्न, कंक्रिट फाल्न रह्यो । अहिले त्यो सबै पहाड काटेर फालेर भित्र पसिसकेकाले पहिले जस्तो जोखिम छैन ।

हाम्रो सशस्त्रको टिमले तीन सिफ्टमा ६/६ जनाको दरले रात दिन नभनी काम गर्‍यो । कमान्डरको काम भने चौबिसै घण्टा हुन्थ्यो । काम सकिएपछि हामी दुई किलोमिटर पर गएर सेनासँग बस्छौं ।

यत्रो दिनपछि दुई जनालाई सकुशल निकाल्न पाउँदा एकदमै खुसी लागेको छ । हाम्रो यत्रो महेनतले पनि सार्थकता पाएको छ । उहाँहरूलाई निकालेपछि हेलिकप्टरमार्फत उपचारका लागि पठाइएको छ ।