वर्षाको समयमा सेतो स्नीकर्स जुत्तालाई नयाँ जस्तै कसरी राख्ने ?

सेतो स्नीकर्स अहिले धेरैको वार्डरोबको महत्वपूर्ण हिस्सा बनिसकेका छन् । यी जुत्ता जिन्स, ट्राउजर, ड्रेस तथा एथलिजर लुकसँग सजिलै मिल्छन् । तर वर्षा सुरु भएसँगै सेतो स्नीकर्स सफा राख्न केही चुनौतीपूर्ण हुन्छ ।

हिलो, फोहोर पानी र चिस्यानका कारण जुत्ता छिट्टै फोहोर देखिन थाल्छन् । यद्यपि, केही सजिला बानी अपनाउने हो भने वर्षायाममा पनि सेतो स्नीकर्सलाई लामो समयसम्म नयाँजस्तै राख्न सकिन्छ ।

घर पुग्नेबित्तिकै हल्का सफा गर्ने

स्नीकर्समा हिलो लागेको छ भने त्यो सुक्ने समयसम्म पर्खनु हुँदैन । घर पुग्नेबित्तिकै नरम ब्रस वा सुख्खा कपडाले जुत्तामा लागेको फोहोर हटाउने त्यसपछि हल्का भिजेको कपडाले जुत्ता पुछ्ने । यसो गर्दा दाग गहिरो हुन पाउँदैन र जुत्ता सफा गर्न पनि सजिलो हुन्छ ।

हल्का साबुनले सफा गर्ने

सेतो स्नीकर्स सफा गर्दा धेरै कडा रसायनयुक्त क्लिनर प्रयोग गर्नु हुँदैन । मनतातो पानीमा थोरै हल्का लिक्विड साबुन मिसाएर नरम ब्रसको सहयोगले जुत्तालाई बिस्तारै सफा गर्नुपर्छ । यसले जुत्ताको रङ र मटेरियल दुवैलाई सुरक्षित राख्न मद्दत गर्छ ।

भिजेपछि सही तरिकाले सुकाउने

वर्षामा भिजेपछि धेरै मानिस जुत्तालाई चर्को घाममा राखेर सुकाउने गर्छन् । तर यसो गर्दा सेतो स्नीकर्स पहेँलो देखिन सक्छन् वा जुत्ताको मटेरियलमा असर पर्न सक्छ । त्यसैले जुत्तालाई हावा राम्रोसँग चल्ने ठाउँमा सुकाउनुपर्छ । जुत्ता धेरै भिजेको छ भने भित्र पत्रिका वा टिस्यु पेपर राख्न सकिन्छ। यसले भित्री चिस्यान सोस्नुका साथै जुत्ताको आकार कायम राख्न पनि मद्दत गर्छ ।

वाटरप्रुफ स्प्रे प्रयोग गर्ने

यदि वर्षामा पनि सेतो स्नीकर्स नियमित लगाउने हो भने जुत्ताका लागि उपयुक्त वाटरप्रुफ स्प्रे प्रयोग गर्न सकिन्छ । यसले जुत्ताको सतहमा सुरक्षात्मक तह बनाउँछ, जसले पानी र सामान्य फोहोरलाई जुत्ताभित्र पस्नबाट केही हदसम्म रोक्न मद्दत गर्छ । स्प्रे प्रयोग गर्नुअघि भने जुत्ताको मटेरियलअनुसार निर्माता कम्पनीको निर्देशन हेर्नु राम्रो हुन्छ ।

लेस र सोललाई पनि सफा गर्ने

धेरैजसो मानिसले जुत्ताको माथिल्लो भाग मात्र सफा गर्छन्, तर लेस र सोल पनि धेरै फोहोर हुने भाग हुन् । त्यसैले लेस निकालेर साबुन पानीमा छुट्टै धुनुपर्छ । त्यस्तै, सोल सफा गर्न पुरानो टूथब्रस वा नरम ब्रस प्रयोग गर्न सकिन्छ । यी भाग सफा भएपछि पूरै स्नीकर्स अझ सफा र नयाँजस्तो देखिन्छ ।

दैनिक केही समय हेरचाह गर्ने

यदि दैनिक स्नीकर्स लगाउने हो भने प्रयोग गरेपछि दुई–तीन मिनेट त्यसको हेरचाहमा दिनुपर्छ । सुख्खा कपडाले धुलो र सामान्य फोहोर हटाउनुपर्छ । जुत्ता पूर्ण रूपमा सुकेपछि मात्र र्याकमा राख्नुपर्छ । भिजेको जुत्ता बन्द ठाउँमा राख्दा दुर्गन्ध आउनुका साथै फंगस तथा ब्याक्टेरिया बढ्ने सम्भावना हुन्छ ।

एकभन्दा बढी जोडी प्रयोग गर्ने

सम्भव भए वर्षायाममा एउटै स्नीकर्स दैनिक लगाउनुको सट्टा दुई वा बढी जोडी पालैपालो प्रयोग गर्नुपर्छ । यसले एउटा जोडीलाई पूर्ण रूपमा सुक्ने पर्याप्त समय दिन्छ । यसबाट जुत्ताको मटेरियलमा पर्ने चिस्यानको असर कम हुनुका साथै जुत्ताको आयु पनि बढाउन सकिन्छ ।

सही तरिकाले भण्डारण गर्ने

स्नीकर्स प्रयोग नगरेको समयमा पहिले राम्रोसँग सफा र सुकाएर मात्र राख्नुपर्छ । त्यसपछि जुत्तालाई सुतीको ब्याग वा हावा चल्ने उपयुक्त बक्समा राख्न सकिन्छ । अत्यधिक चिसो वा बन्द ठाउँमा राख्नुभन्दा सुख्खा र हावायुक्त स्थान रोज्नु राम्रो हुन्छ । यसले धुलो र चिस्यानबाट जुत्तालाई जोगाउन मद्दत गर्छ ।

ध्यान दिनुपर्ने कुरा

वर्षायाममा सेतो स्नीकर्सको चमक कायम राख्न समयमै सफा गर्ने, भिजेपछि सही तरिकाले सुकाउने, आवश्यक परे वाटरप्रुफ सुरक्षा प्रयोग गर्ने र उचित स्थानमा भण्डारण गर्ने बानी बसालियो भने स्नीकर्सलाई लामो समयसम्म सफा र नयाँजस्तै राख्न सकिन्छ । थोरै नियमित हेरचाहले जुत्ताको सुन्दरता मात्र होइन, यसको टिकाउपन पनि बढाउँछ ।