चोलेन्द्र पक्राउबारे एसएसपी खड्काले भने– ‘सुरक्षा थ्रेट’ भएकाले कार्यालयमा ल्याएका हौँ

News Summary

Generated by OK AI. Editorially reviewed.

एसएसपी सन्तोष खड्काले पूर्वप्रधानन्यायाधीश चोलेन्द्र शम्शेर जबरालाई सुरक्षा थ्रेटपछि अपराध अनुसन्धान कार्यालय टेकुमा राखिएको बताए।
प्रहरीको टोलीले गएराति जबरालाई महाराजगञ्जस्थित निवासबाट नियन्त्रणमा लिएको थियो।
जबरालाई पक्राउ गर्दा कुनै अदालतको पक्राउ पुर्जी नलिइएको सम्बद्ध स्रोतले जनाएको छ।

११ असोज, काठमाडौं । अपराध अनुसन्धान कार्यालय टेकुका एसएसपी सन्तोष खड्काले पूर्वप्रधानन्यायाधीश चोलेन्द्र शम्शेर जबरालाई सुरक्षा थ्रेटपछि कार्यालयमा ल्याएर राखिएको बताएका छन् ।

एसएसपी खड्काले आज बिहान अनलाइनखबरसँग कुरा गर्दै सो जानकारी दिएका हुन् ।

गएराति अपराध अनुसन्धान कार्यालयको टोलीले जबरालाई महाराजगञ्जस्थित निवासबाट नियन्त्रणमा लिएको थियो ।

रातारात जबरालाई पक्राउ किन गरियो भन्ने प्रश्नमा एसएसपी खड्काले भने, ‘उहाँलाई सुरक्षा थ्रेट छ भन्ने थाहा पाएपछि राति नै केही हुनसक्छ भनेर हाम्रो कार्यालयमा ल्याएर राखेका हौं ।’

जबरालाई नियन्त्रणमा लिनुअघि प्रहरीले कुनै पनि अदालतबाट पक्राउ पुर्जी नलिएको सम्बद्ध स्रोतले जनाएको छ ।

प्रहरी पक्राउ गर्न आएपछि जबराले भाइ प्रभुशम्शेरलाई फोन गरेर जानकारी गराएका थिए । प्रभुशम्शेरले पनि आज बिहान अनलाइनखबरसँग कुरा गर्दै भने, ‘जेनजीहरुबाट तपाईंलाई थ्रेट छ भन्दै प्रहरीहरुले दाइलाई पक्रेर लगेछन् ।’

प्रभुशम्शेरका अनुसार जबरालाई अपराध अनुसन्धान कार्यालय टेकुमा राखिएको छ । प्रहरीले कसैलाई भेट्न समेत नदिएको उनी निकट स्रोत बताउँछ । अहिले उनका छोरा भेट्न भन्दै टेकु पुगेका छन् ।