विवाहअघिको शारीरिक सम्बन्धबारे किरण रावको भनाइ किन चर्चामा छ ?

किरण राव जो आफैँमा सफल निर्देशक हुन् । यद्यपि उनलाई आमिर खानसँग जोडेरपनि चिनाउने गरिन्छ । अर्थात आमिर खानकी पूर्व पत्नीको रूपमा ।

उनै किरण रावको एउटा तर्क अहिले निकै चर्चामा छ । खासगरी विवाहअघिको शारीरिक सम्बन्धलाई लिएर उनको भनाइले चर्चा पाएको हो । बलिउडकी निर्देशक किरण रावले पनि अहिलेको पुस्ताले सम्बन्धलाई हेर्ने दृष्टिकोणमा आएको परिवर्तनबारे बताएकी हुन् ।

आफ्नो फिल्म ‘लस्ट स्टोरिज ३’ को प्रचारका क्रममा उनले आफ्नो पुस्ता र अहिलेको पुस्ताबीच प्रेम तथा सम्बन्धलाई बुझ्ने तरिकामा ठूलो परिवर्तन आएको बताएकी छिन् ।

पहिले सम्बन्धको एउटा सीमा थियो

किरण रावले आफ्नो पुस्ताको कुरा गर्दै सम्बन्धमा निश्चित सामाजिक सीमा रहेको सम्झिएकी छिन् । उनका अनुसार पहिले कुनै व्यक्तिसँग गम्भीर सम्बन्धमा जानुअघि निश्चित सामाजिक तथा पारिवारिक मान्यताहरू पालना गर्नुपर्ने अपेक्षा हुन्थ्यो । शारीरिक र भावनात्मक निकटतालाई पनि विवाहसँग जोडेर हेरिन्थ्यो ।

अर्थात् प्रेम थियो भने पनि त्यसको एउटा निश्चित बाटो थियो, सम्बन्ध, परिवारको स्वीकृति र अन्ततः विवाह । विवाहअघि कसैसँग शारीरिक वा भावनात्मक रूपमा नजिक हुनु समाजले सहज रूपमा स्वीकार्ने विषय थिएन ।

किरणका शब्दमा, उनको पुस्तामा कसैसँग शारीरिक वा भावनात्मक रूपमा जोडिनु भनेको विवाहपछि मात्रै स्वाभाविक मानिन्थ्यो । अहिलेको पुस्तामा भने अवस्था बिल्कुल फरक छ ।

यही फरकले दुई पुस्ताबीचको सम्बन्ध बुझ्ने तरिकामा आएको परिवर्तन देखाउँछ ।

शारीरिक सम्बन्धका लागि विवाह अनिवार्य छैन ?

सम्बन्धमा आएको यही परिवर्तनबारे कुरा गर्दै किरणले आजको पुस्ता शारीरिक र भावनात्मक सम्बन्धलाई विवाहसँग मात्रै जोडेर नहेर्ने बताएकी छन्। उनका अनुसार अहिले दुई व्यक्ति विवाह नगरी पनि एकअर्काप्रति आकर्षित हुन सक्छन्, भावनात्मक रूपमा नजिक हुन सक्छन् र शारीरिक रूपमा समेत जोडिन सक्छन् ।

यसको अर्थ विवाहको महत्व सकियो भन्ने होइन । बरु, सम्बन्धको अर्थ र त्यसलाई बुझ्ने दृष्टिकोण परिवर्तन भएको हो । पहिले समाजले सम्बन्धको सीमा निर्धारण गरिदिन्थ्यो । अहिले त्यो निर्णय व्यक्तिको रोजाइमा धेरै हदसम्म पुगेको छ ।

आकर्षणपछि के हुन्छ ?

किरण रावको ‘लस्ट स्टोरिज ३’ को कथाले पनि यही बदलिँदो सम्बन्धलाई हेर्ने प्रयास गरेको छ । कथामा दुई युवा छन् । उनीहरू एकअर्काप्रति आकर्षित हुन्छन् । उनीहरू कुनै निश्चित सामाजिक बन्धनमा छैनन् । त्यसैले, सम्बन्धलाई अघि बढाउन विवाह नै पहिलो सर्त बन्नुपर्छ भन्ने सोच उनीहरूमा छैन ।

तर कसैप्रति आकर्षित हुनु र सम्बन्धमा प्रवेश गर्नु एउटा कुरा हो । त्यसपछि आउने परिणामको सामना गर्नु अर्को कुरा ।

किरणका अनुसार कथाको रोचक पक्ष पनि यही हो । दुई व्यक्तिले आफ्ना निर्णय लिन्छन् र त्यसपछि केही अप्रत्याशित घटना घट्छन् । अर्थात् स्वतन्त्रतासँगै निर्णयको जिम्मेवारी पनि आउँछ ।

विवाह अब सम्बन्धको अन्तिम प्रमाण बन्दैन

किरण रावले विवाहलाई सम्बन्धको अनिवार्य सर्तका रूपमा हेर्ने पुरानो सोचमाथि पनि प्रश्न उठाएकी छिन् । आज दुई व्यक्ति विवाह नगरी पनि एकअर्कासँग गहिरो र वास्तविक सम्बन्धमा रहन सक्छन् । उनीहरू भावनात्मक रूपमा नजिक हुन सक्छन्, शारीरिक रूपमा जोडिन सक्छन् र एकअर्काको जीवनमा महत्वपूर्ण स्थान बनाउन सक्छन् ।

यसले विवाहको महत्व सकियो भन्ने होइन । बरु, सम्बन्ध र विवाहलाई एउटै कुरा मान्ने पुरानो सोचमा परिवर्तन आएको संकेत गर्छ । कुनै सम्बन्धको गहिराइ विवाहको प्रमाणपत्रले निर्धारण गर्दैन । त्यहाँ आपसी समझदारी, सम्मान, विश्वास र जिम्मेवारी पनि उत्तिकै महत्वपूर्ण हुन्छन् ।

पहिले प्रश्न हुन्थ्यो, ‘समाजले के भन्छ ?’  अहिले प्रश्न बदलिएको छ, ‘म के चाहन्छु ?’

किरण रावको ‘लस्ट स्टोरिज ३’ ले यही नयाँ संसारलाई पर्दामा उतार्न खोजेको देखिन्छ । जहाँ प्रेमका लागि पहिले जस्ता धेरै बन्देज छैनन्, सम्बन्धका लागि विवाह नै अनिवार्य सर्त छैन र युवाहरू आफ्ना भावनाबारे खुलेर बोल्न सक्छन् ।

किरण राव आफैं पनि सम्बन्धलाई परम्परागत परिभाषाभन्दा फरक ढंगले बुझ्ने उदाहरण हुन् । उनले अभिनेता आमिर खानसँग सन् २००५ मा विवाह गरेकी थिइन् । करिब १५ वर्ष वैवाहिक सम्बन्धमा रहेपछि उनीहरू सन् २०२१ मा अलग भए । तर सम्बन्ध टुंगिएपछि पनि उनीहरूबीचको मित्रता भने कायम छ ।

किरण र आमिर अहिले पनि एकअर्कालाई असल साथीका रूपमा सम्मान गर्ने बताउँछन् । उनीहरू आफ्ना काम तथा पारिवारिक जिम्मेवारीका कारण पनि सम्पर्कमा रहन्छन् र विभिन्न कार्यक्रम तथा पार्टीहरूमा समेत सँगै देखिने गरेका छन् ।