कैलाली बस दुर्घटना : मृतकको संख्या १३ पुग्यो

१५ मंसिर, कैलाली । कैलालीको सहजपुरमा गत शनिबार भएको बस दुर्घटनामा मृत्यु हुनेको संख्या १३ पुगेको छ । उपचार गर्न भारतको हल्दवानी लगिएका जंग भण्डारीको मृत्यु भएपछि बस दुर्घटनामा ज्यान गुमाउनेहरुको संख्या १३ पुगेको हो ।

आफन्तले शव बुझेनन्

यसैबीच बस दुर्घटनामा ज्यान गुमाएकाका आफन्तहरुले शव बुझ्न अस्वीकार गरेका छन् ।

मृतकका बालबालिकाको पालनपोषण र शिक्षाको जिम्मेवारी बस समितिले लिनु पर्ने, मृतकका परिवारलाई प्रतिव्यक्ति ३ लाख रुपैया क्षतिपूर्ति दिनु पर्ने लगायत माग राख्दै उनीहरुले शव बुझ्न अस्वीकार गरेका हुन् ।

उनीहरुले दुर्घटनामा बस चालकको लापरबाही देखिएकाले चालकलाई कर्तव्य ज्यान मुद्दा चलाउनु पर्नेलगायतका माग पनि राखेका छन् ।

मृत्यु भएका मध्ये ८ जनाका आफन्तले शव बुझेका छैनन् । पाँच जनाका आफन्तले भने आइतबार शव बुझेर लगेका छन् ।

-दीपक उपाध्यायबाट