+
+

सुनील प्रजापतिको गुनासो – ऐन–कानुन नबन्दा काम गर्न सकिएन

सम्पदा पुनर्निर्माणदेखि भूस्याहा कुकुर नियन्त्रणलगायतमा जनताको चासो

रासस रासस
२०७४ असार २८ गते ९:०५


२८ असार, भक्तपुर । भक्तपुर नगरपालिकाले सार्वजनिक सुनुवाइ कार्यक्रम गरेको छ ।

कार्यक्रममा नवनिर्वाचित नगरप्रमुख सुनिल प्रजापतिले सरकारलाई स्थानीय तह सञ्चालनसम्बन्धी ऐन–कानुन छिटो बनाउन आग्रह गरे ।

उनले भने, ‘सरकार एकातिर स्थानीय तहको अधिकार कटौती गर्दैछ, अर्कोतर्फ जनप्रतिनिधि नहुँदा वर्षौंदेखि थुप्रिएको थुप्रै काम गर्नुपर्ने जिम्मेवारी आएको छ, तर सरकारले स्थानीय तह सञ्चालनसम्बन्धी ऐन–कानुन नबनाएकाले काम गर्न निकै कठिनाइ परेको छ ।’

प्रजापतिले भक्तपुरलाई पारदर्शिताको नमूना नगर बनाउने उद्देश्यसहित कार्य अगाडि बढाइरहेको बताउँदै जनताको भावना एवम् निर्वाचन घोषणापत्रमा उल्लेख भएका योजना क्रमशः कार्यान्वयन गर्दै जाने विश्वास दिलाए ।

नगरपालिकाले मापदण्ड पूरा गरेको नक्सा छिटो पास गर्ने गरी प्रक्रिया अगाडि बढाएको, नगरपालिकामा वर्षौंदेखि थाती रहेका मुद्दाहरु फछ्र्यौट गर्ने कार्यलाई तीव्र गति दिएको र खानेपानी तथा ढल व्यवस्थापन गर्ने कामलाई उच्च प्राथमिकतामा राखेको उनले बताए ।

त्यस अवसरमा उपप्रमुख रजनी जोशीले नगरपालिकाको हरेक काममा जनताले अनुगमन गर्नुपर्ने बताइन् ।

कार्यक्रममा सहभागी स्थानीय बासिन्दाले पर्यटकका लागि ठाउँ–ठाउँमा शौचालय निर्माण गर्नुपर्ने, भक्तपुर नगरपालिकाले अनलाइन माध्यमबाट नक्सा दर्ता एवम् नक्सापास गर्ने प्रक्रिया अघि बढाउनुपर्ने, पुरातात्विक सम्पदा पुनःनिर्माण कार्यको वृत्तचित्र बनाउनुपर्ने, भक्तपुर औद्योगिक क्षेत्रका ठूला उद्योगलाई अन्यत्र स्थानान्तरण गर्नुपर्ने, नगर क्षेत्रभित्र बिहान ८ देखि साँझ ६ बजेसम्म ठूला गाडी प्रवेश निषेध गर्नुपर्ने, भुस्याहा कुकुर तथा छाडा चौपाया नियन्त्रण गर्नुपर्नेलगायत सुझाव दिएका थिए ।

सो अवसरमा नगरपालिकाका कार्यकारी अधिकृत रोहितराज पोखरेल, आयोजना प्रमुख ओमहरि श्रेष्ठ, मुद्दा शाखा प्रमुख गणेशलाल फोजू तथा स्यानिटेसन शाखा प्रमुख दिलीपकुमार सुवालले नगरवासीबाट उठेका प्रश्नको जवाफ दिएका थिए । रासस

लेखकको बारेमा
रासस

रासस (राष्ट्रिय समाचार समिति) नेपालको सरकारी समाचार संस्था हो ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?