छक्कबहादुरलाई छक्क पार्दै सञ्चारमन्त्रीको घोषणा– हुम्ला सूचना प्रविधिमा काठमाडौं जस्तै हुन्छ

९ माघ, काठमाडौं । हुम्ला सदरमुकामसहित सिंगो जिल्ला हिउँले पुरिएका बेला त्यहाँबाट निर्वाचित सांसद छक्कवहादुर लामा गाउँपालिका अध्यक्षहरु र वडाध्यक्षसहित बुधवार सञ्चार मन्त्रालयमा पुगे ।

हुम्लीलाई हेपिएको गुनासो गर्दा गर्दै सन्चारमन्त्री गोकुल बास्कोटाले उनलाई रोकेर भने– हिजो के भयो थाहा छैन, तर अब हुम्ला र सिंगो कर्णालीलाई सकारात्मक विभेदको नीतिबाट संरक्षण गरिन्छ ।

तिब्बत मानसरोबरसँग सीमाना जोडिएको नाम्खा गाउँपालिका अध्यक्ष बिष्णु लामाले सिंगो गाउँपालिका सञ्चार सम्पर्कबाट विच्छेदको अवस्थामा रहेको सुनाउनासाथ मन्त्रीले जेठको डेडलाइन दिए । हुम्लामात्र होइन, कर्णालीलाई टेलिफोन र इन्टरनेटको पहुँच दिलाउन आफूले सकारात्मक विभेदको नीति अपनाएको उनले सुनाए ।

सांसद र गाउँपालिकाका जनप्रतिनिधिलाई उनले भने, ‘अब हुम्लीले चित्त दुःखाउनुपर्दैन, वर्ष दिनभित्र कर्णाली सञ्चार प्रविधिको हिसाबले काठमाडौंजस्तै हुन्छ । नाम्खामा जेठभित्र इन्टरनेट आउँछ । म नचाहिने आश्वासन दिन्नँ । अहिले मैले चाहेर पनि प्राविधिक टोली तपाईहरुको गाउँमा पुग्न सक्दैन ।’

हुम्लाका अधिकांश गाउँमा टेलिफोन पुगेको छैन । त्यसैले उनीहरुको माग टेलिफोन टावर राखियोस् भन्ने रहेछ । अघिल्लो वर्ष टावरको ठेक्का पाएका ठेकेदार नै भागेपछि गाउँपालिका अध्यक्षहरु टेलिकममा धेरै धाए । तर, टेलिकमका सम्बन्धित अधिकारीले ‘मन्त्रीको ज्याक’ लाएमात्रै काम हुने भनेपछि उनीहरुले आफ्ना सांसद छक्कबहादुर गुहारे ।

स्थानीय तहका जनप्रतिनिधि लिएर सिंहदरबार पुगेका सांसद छक्कबहादुरले मन्त्रीलाई भने, लौ हेरौं माननीयज्यूको पहुँच कति रहेछ भनेपछि मन्त्रीज्यूसँग गुहार माग्न आएँ । भूगोलले त हामीलाई ठग्यो नै, कम्युनिस्ट पार्टीको सरकारले त नठग्ला भनेर आयौं । टेलिफोन टावर र मोबाइल चल्ने व्यवस्था होस् ।

टावर माग्न गएका हुम्लीलाई सञ्चारमन्त्री बास्कोटाले बोनस आश्वासन थपिदिए । उनले टावर र इन्टरनेट सेवा एक वर्षभित्र काठमाडौं सरह हुने आश्वासन दिँदै बोनस स्वरुप हरेक गाउँपालिकामा इन्टरनेट र एपका साथै स्कूलहरुमा कम्प्युटर ल्याब पठाइहाल्ने बताए । उनले सूचांकमा पछि परेका कर्णाली र प्रदेश २ लाई आफूले प्राथमिकतामा राखेको बताए ।

मन्त्री बास्कोटाले भने– मैले चुनाव जितेको जिल्लामा ४ लाखभन्दा बढी जनसंख्या छ, तर जम्मा चार स्कूललाई कम्प्युटर ल्याब दिन सकेँ । तर, हुम्ला र प्रदेश दुईलाई मैले त्यो भन्दा धेरै दिएको छु । अब केही समयमै कम्प्युटर ल्याब जडान हुनेछन्, उद्घाटन गर्न आउँला । कुनै पनि हिसाबले अब हुम्लालाई सूचना प्रविधिको हिसाबले काठमाडौंसरह बनाउँछु, नहुने कुरा म बोल्दै बोल्दिनँ ।

हुम्लामा गत वर्षको चुनावमा बाम गठबन्धनका बागी उम्मेदवार बनेर जितेका छक्कबहादुर लामाले मन्त्रीले बोलेको काम गरिदिए हुम्लामा हर्षबढाइँ हुने बताए ।

उनलाई मन्त्रीले जिल्लाका कुन कुन ठाउँमा टावर चाहिएको हो, सो खुलाएर निवेदन ल्याउन आग्रह गर्दै भने, काठमाडौंमा सुविधा छ, सुन्दरता चाहियो, हुम्लामा सुन्दरता छ, सुविधा अब हामी दिन्छौं ।’