९ मंसिर, काठमाडौं । भारतीय प्रधानमन्त्री नरेन्द्र मोदीले वीर अस्पतालको ट्रमा सेन्टर उदघाटन गर्ने कार्यक्रमको जम्मा ‘सेड्युल’ आधा घण्टाको थियो । तर, मोदीले एक्लै ४० मीनेटसम्म भाषण गरे ।
उदघोषकले कार्यक्रम आधा घण्टामा सकिने बताएका थिए । नेपालका प्रधानमन्त्री र स्वास्थ्यमन्त्रीले संक्षिप्त बोलेका थिए । तर, दक्षिण एशियाको मात्रै नभई संसारकै नेतृत्व गर्ने महत्वाकांक्षा बोकेका भारतीय प्रधानमन्त्रीले भाषण गर्न थालेपछि ४० मीनेट समय बिताइदिए ।

मोदीले ट्रमा सेन्टर उदघाटनका अवसरमा मनमा आएजति सबै भाषण त्यहीँ सिध्याउन खोज्दा भारतीय दूताबासले बनाएको कार्यतालिका भताभुंग भयो । यसको परिणास्वरुप मोदीलाई भेट्न सोल्टी होटलमा पुगेका नेपाली नेताहरु दुख पाए ।
मोदीको भाषणमा कुनै तालमेल मिलेको थिएन । उनले जनकपुर र लुम्बिनीमा बोल्न नपाएको भोक ट्रमा सेन्टरबाटै तृप्त गरे । स्वास्थ्य मात्रै होइन, विभिन्न योजना र सपनाहरु मोदीले आफ्नो भाषणमा मिसाए ।
समयको परिपालनाका दृष्टिले मोदीमा कमजोरी देखिए पनि नेपाली नेताहरुलाई दिएको समय निचोरेर मोदीले आफ्नो भाषणलाई महत्व दिए ।
मोदीले जानीजानी कार्यतालिका मिचेर भाषण गरेका हुन् या उनी बोल्दाबोल्दै बढ्दा भावनामा बहकिएका हुन् स्पष्ट हुन सकेको छैन । भाषणमा उनी बहकिएपछि पछिल्ला कार्यक्रमहरुको रुटिन खल्बलिएको हो ।

२२ दललाई खुशी पार्ने काम
नेपाली राजनीति चर्को ध्रुवीकरणतर्फ गइरहेका बेला मोदीको राजनीतिक अभिव्यक्ति सन्तुलित थिएन । उनले सत्तापक्षका नेताहरुले प्रक्रियाबाट संविधान बनाउने भन्दै प्रतिपक्षलाई पेलिरहेका बेला मोदीले आफ्नो कित्ता माओवादी र मधेसवादीसँगै रहेको स्पष्ट सन्देश दिए ।
मोदीको अभिव्यक्तिले सार्कसम्मेलन सकिनासाथ आन्दोलन गर्ने बताइरहेका एमाओवादी र मधेसवादी दललाई उत्साही बनाएको छ भने सत्तापक्षलाई निराश पारेको छ ।
भाषण गर्ने क्रममा भावनामा बगेका मोदीले ६ बजे राष्ट्रपति रामवरण यादवलाई भेटेपछि क्रमशः कांग्रेस, एमाले, एमाओवादी  मधेसवादी दलका नेतालाई भेट्ने समय भारतीय दूतावासले मिलाएको थियो । तर, नेताहरुले मोदीलाई सोल्टी होेटलमा तोकिएको समयभन्दा ढीलोसम्म कुर्नुपर्‍यो ।
यसैवीच मोदीले राजतन्त्र र हिन्दु राष्ट्रको माग गर्दै आएका राप्रपा नेपालका अध्यक्ष कमल थापालाई विहीबार बिहान साढे ८ बजे सोल्टी होटलमा भेट गर्ने समय तय भएको सो पार्टीका सहप्रवक्ता मोहन श्रेष्ठले अनलाइनखबरलाई बताएका छन् ।