नेपाल चलचित्र निर्माता संघले चलचित्र संघसँगको सहकार्य आजैका मितिबाट तोडेको घोषणा गरेको छ । नेपाली चलचित्रमा देखिएका समस्याहरुलाई दुई संघले मिलेर समाधान गरेको अवस्थामा हिन्दी चलचित्रका हिमायतीहरुले देखाएको रवैयाका कारण संझौता तोडिएको महासचिव केशव भट्टराइद्धारा जारी विज्ञप्तीमा भनिएको छ ।
चलचित्र निर्माता संघ र चलचित्र संघविच असार र साउनमा चलचित्र प्रदर्शन गर्ने निर्मातालाई ६० प्रतिशत दिने सहमती भएसँगै कार्यदल पनि बनेको थियो । तर, आइतबार चलचित्र संघबाट बनेको कार्यदलले अध्यक्ष नकिम उद्दिनले नै असहयोग गरेको भन्दै राजिनामा दिएको थियो ।
यस बिषयमा आफ्नो मुख खोल्दै निर्माता संघले हिन्दी चलचित्रका हिमायतीहरुले मल्टिप्लेक्समा यो सुविधा नदिने भनाई राखेकोमा खेद प्रकट पनि गरेको छ । नेपाली चलचित्रको विकासका लागि सबैजना लाग्नुपर्ने अवस्थामा चलचित्र संघ जस्तो जिम्मेवारी संस्थाले देखाएको व्यवहारका कारण निर्माता संघले सहकार्य तोडेको बताएको छ ।
मल्टिप्लेक्समा नेपाली चलचित्रलाई ६० प्रतिशत शेयरको सुविधा नदिने भन्दै चलचित्र संघका अध्यक्ष नकिम उद्दिनले अडान राखेका थिए । जसका कारण चलचित्र संघको तर्फबाट बनेको कार्यदलले राजिनामा दिएको थियो । काठमाण्डौको क्यूएफएक्स संचालन गर्दै आएका उद्दिनको अडानले नेपाली चलचित्रबाट आम्दानी गरिरहेका हलहरु मर्कामा परेका छन् ।
अर्कोतिर, निर्माता संघले चलचित्र संघसँग सहकार्य तोडिएको घोषणा गरेसँगै अब दुई संघविच शितयुद्ध पनि सुरु भएको देखिन्छ ।
