१४ भदौ, काठमाडौं । जनताका प्रतिनिधिले संविधान बनाइरहेका बेला कतिपय विदेशी समुदायले नकारात्मक ढंगले चलखेल गरिरहेको भन्दै नेकपा एमालेले चिन्ता व्यक्त गरेको छ ।
स्थायी कमिटीको सोमबारको बैठकमा परराष्ट्रमन्त्री महेन्द्रबहादुर पाण्डेको ब्रिफिङ सुनेपछि एमालेले जनप्रतिनिधिले बनाएको संविधानलाई अन्तर्राष्ट्रिय समुदायले विना टिप्पणी स्वागत गर्नुपर्ने ठहर गरेको हो ।
बैठकमा एमालेका सबै मन्त्रीहरुलाई राखिएको थियो । सरकारका काम कारवाही र कांग्रेसको एकलौटी सत्ता सञ्चालनका बारेमा धारणा बनाउन बसेको बैठक पछिल्लो परिस्थितिको मूल्यांकनमै बढी केन्दि्रत हुन पुगेको एक नेताले बताए ।
बैठकमा गृहमन्त्री बामदेव गौतम र परराष्ट्र मन्त्री महेन्द्रबहादुर पाण्डेले संविधान निर्माणका सन्दर्भमा राष्ट्रिय अन्तर्राष्ट्रिय परिस्थितिको जानकारी गराएका थिए ।
एमाले बैठकले देशभर शान्ति र सद्भावका लागि कार्यक्रम गर्ने र कार्यकर्ता परिचालन गर्ने निर्णय समेत गरेको छ । बिभिन्न जिल्लामा एमाले कार्यालयमा भएको आगजनीको पनि एमालेले निन्दा गर्दै दोषीमाथि कारवाहीको माग गरेको छ ।
