२८ भदौ, काठमाडौं । आन्दोलनरत संघीय समाजवादी फोरमका अध्यक्ष उपेन्द्र यादवले बिहेको निम्तो गरेजसरी कार्ड पठाएका भरमा वार्ता नहुने बताएका छन् ।
आफूहरु अहिले पनि वार्ताको पक्षमा रहेको यादवले जनाऊ दिएका छन् । ‘हामी अहिले पनि वार्ताका लागि तयारै छौं, यादवले अनलाइनखबरसँग कुरा गर्दै भने, ‘तर, सरकार वार्ताका लागि सिरियस छैन, ऊ वार्ता चाहँदैन, दमन गरेर शासन चलाउन चाहन्छ ।’
वार्ताका लागि वातावरण बनाउनुको साटो एकलौटी ढंगले संविधान जारी गरेर अघि बढ्न खोज्दा मुलुकको परिस्थिति थप जटिल बनेको र देश द्वन्द्वतिर धकेलिएको यादवले बताए ।
‘सरकारले वार्ताको वातावरण बनायो भने हामीले अहिले पनि वार्तामा बस्दैनौं भनेका छैनौं,’ यादवले अनलाइनखबरसँग भने, ‘बिहेको निम्तो पठाएजसरी कार्ड पठाएर वार्तामा आऊ भनेका भरमा वार्ता हुँदैन, यसका लागि सरकारले तयारी गर्नुपर्छ, विगतमा भएका सहमति कार्यान्वयन हुने नहुने ठोस रुपमा आउनुपर्छ ।’
