२६ असोज, काठमाडौं । काठमाडौं उपत्यकाका पेट्रोलपम्पहरुमा इन्धन भर्न निजी सवारी साधनहरुको लामो लाइन लागेको छ । निजी सवारी साधनहरुलाई पेट्रोलपम्पहरुबाट मंगलबार तेल बाँडिदैछ ।
तर, सवारी साधनको लाइनलाई हेर्दा ति सबैलाई तेल पुर्याउन नसकिने निगमको भनाइ छ । काठमाडौं उपत्यकामा दैनिक चालीस लाख पेट्रोल खपत हुने भए पनि मंगलबार ६ लाख लिटर मात्रै बाँड्ने निगमको योजना छ ।
भारतको अघोषित नाकाबन्दीका कारण इन्धन अभाव भएपछि निजी सवारी साधनलाई तेल बाँड्न बन्द गरेर सार्बजनिक सवारी साधनहरुलाई मात्रै बाँडिएको थियो । मंगलबार निजी गाडीहरुलाई पनि तेल बाँड्ने जानकारी पाएदेखि नै पेट्रोलपम्प अगाडी सवारी साधनहरुको लाइन लाग्न सुरु गरेको थियो ।
ललितपुरको साझा पेट्रोलपम्ममा शनिबारदेखि नै मोटरसाइकल, स्कुटर र कारहरुको लाइन लागेको थियो । सो लाइन पाटन कृष्ण मन्दिरभन्दा पनि परसम्म पुगेको छ । तेल भर्ने गाडीहरूकाे दोहोरो तेहेरो लाइनले यातायात ट्राफिक व्यवस्थापनमा समेत असहज भएको छ ।
यसैगरी भद्रकालीस्थित नेपाली सेनाको पेट्रोलपम्पमा तल भर्नका लागि पालो कुरेर बसेका मोटरसाइकलहरुको लाइनले बबरमहल क्रस गरिसकेको छ ।
नयाँबानेश्वरस्थित ब्रदर्श पेट्रोल पम्पमा तेल भर्नेहरुको लाइन शंखमुलसम्म पुगेको छ । नक्सालस्थित प्रहरीको पेट्रोलपम्पको लाइन नागपोखरी भन्दा परसम्म पुगेको छ ।
नेपाल आयल निगमले दशैंमा काठमाडौंबाट घर जान चाहनेहरुलाई सहज होस् भनेर निजी मोटरसाइकल, कार र भ्यानहरुलाई मंगलबार तेल दिन लागेको हो । घण्टौंसम्म लाइनमा लागेकाहरू थकित र तनाव मुद्रामा देखिन्छन् । तेल भर्नका लागि ब्लुबुक अनिवार्य रुपमा बोक्न सवारी चालकहरुलाई भनिएको छ ।
तस्वीर : कविन अधिकारी/अनलाइनखबर
