१३ मंसिर, काठमाडौं । भूकम्प, मधेस आन्दोलन र भारतीय नाकाबन्दीले बैंकहरुको नाफामा असर गरेको छ । व्यवसाय वृद्धिको तुलनामा बैंकहरुको नाफा बढ्न सकेको छैन ।

चालू आर्थिक वर्षको असोज मसान्तसम्ममा वाणिज्य बैंकहरुले ५ अर्ब ८२ करोड ५९ लाख रुपैयाँ नाफा कमाएका छन् । गत आर्थिक वर्षको यसै अवधिमा ४ अर्ब ४७ करोड ९३ लाख रुपैयाँ नाफा कमाएका थिए ।

तर, यस अवधिमा बैंकहरुको निक्षेप संकलन भने झन्डै २ खर्ब रुपैयाँले र कर्जा ५६ अर्ब रुपैयाँले मात्रै बढेको छ । नाफामा असर नदेखिए पनि बैंकहरुको कर्जा विस्तारमा भने मधेस आन्दोलन र भारतीय नाकाबन्दीको असर देखिएको हो ।

बैंकहरूको नाफा (रू.हजारमा)

०७१ असोज मसान्तमा ११ खर्ब ७२ अर्ब ८२ करोड रुपैयाँ निक्षेप संकलन गरी ९ खर्ब ५९ अर्ब ५६ करोड रुपैयाँ कर्जा प्रवाह गरेका बैंकहरुले ०७२ असोज मसान्त्मा १३ खर्ब ३२ अर्ब ४९ करोड रुपैयाँ निक्षेप संकलन गरी १० र्ख १५ अर्ब २ करोड रुपैयाँ कर्जा प्रवाह गरेका छन् ।

निक्षेपको तुलनामा कर्जाको वृद्धिदर कम भएकाले र बैंकिङ प्रणालीमा थुपि्रएको अत्यधिक लगानी योग्य रकम (अधिक तरलता) का कारण व्याजदर घटेपछि बैंकहरुको खुद व्याज आम्दानी खासै बढ्न नसक्दा बैंकहरुको नाफा पनि बढ्न नसकेको हो ।

बैंकहरुको नाफा सन्तोषजनकरुमा नबढे पनि कुनैपनि बैंकको नाफा घटेको भने छैन । बैशाखको भूकम्पदेखि देश लगातार संकटबाट गुजि्ररहेकाले आर्थिक गतिविधि कम हुँदा पनि बैंकहरुको नाफा नघट्नु भने सकरात्मक पक्ष हो । तर, मधेस आन्दोलन र भारतीय नाकाबन्दीको असर पुस मसान्तको वित्तीय विवरणमा देखिने सानिमा बैंकका प्रमुख कार्यकारी अधिकृत भुवन दाहालले अनलाइनखबरलाई जानकारी दिए ।

‘यो त्रैमासमा मधेस आन्दोलन र भारतीय नाकाबन्दीको खासै ठूलो असर देखिएको छैन तर पुस मसान्त्को प्रतिवेदनमा भने उल्लेख्य असर देखिने छ ।’ दाहालले भने । अहिलेसम्म व्याज र कर्जा असूलीमा समस्या नदेखिएकाले पनि नाफामा ठूलो असर नपरेको उनले बताए ।

कुल कर्जामा बैंकहरूको खराब कर्जाको अनुपात (प्रतिशतमा)