१४ असार, काठमाडौं । अष्ट्रेलियन राजदूत ग्लेन ह्वाइटले माओवादी केन्द्रका अध्यक्ष प्रचण्डलाई भेटेर आफ्नो सरकारका तर्फबाट प्रचण्डको सुरक्षामा कुनै समस्या नरहेको स्पष्ट पारेका छन् ।
प्रचण्डसँग भेट गर्न राजदूत ह्वाइट मंगलबार बिहान लाजिम्पाटस्थित प्रचण्ड निवासमा पुगेका थिए । यसक्रममा उनले प्रचण्डको अष्ट्रेलिया भ्रमण स्थगित हुनुको कारणबारे चासो राखेको प्रचण्डको सचिवालयले जनाएको छ ।
भेटबारे प्रचण्डको सचिवालयले भनेको छ- ‘अष्ट्रेलियन राजदुतले आफू नियमित रुपमा अष्ट्रेलियन सरकार, पुलिस र महान्यायधिवक्ताको सम्पर्कमा रहेको र त्यसक्रममा कुनै समस्या नरहेको कुरा जानकारी गराउनुभयो ।’
यसैसाता माओवादी अध्यक्ष प्रचण्डले आफ्नो अष्ट्रेलिया भ्रमण स्थगित गरेपछि यसबारे विभिन्न आशंकाहरु हुँदै आएका थिए । अष्ट्रेलियामा प्रचण्डविरुद्ध उजुरी परेको र उनी पक्राउ पर्न सक्ने भएकाले भ्रमण स्थगित भएको धेरैको अनुमान थियो ।
जवाफमा माओवादी केन्द्रका अध्यक्ष प्रचण्डले मिडियामा आएको जस्तो स्थिति नरहेकोबारे आफु अवगत रहेको बताए । वर्तमान राजनीतिक स्थिति, पार्टी कामको चापका कारणले स्थगित गर्नुपरेको उनले बताए ।
अष्ट्रेलियामा आम निर्वाचन हुन गइरहेकोले भ्रमणको समय पनि उपयुक्त नभएकोले पनि भ्रमण स्थगित गर्नु परेको उनले बताए । साथै उपयुक्त समयमा अष्ट्रेलियाको भ्रमण गर्ने बताएका छन् ।
भेटमा प्रचण्डले संविधान कार्यान्वयन गर्न, शान्ति प्रक्रियाका बाँकी कार्यभार पुरा गर्न, मधेशी, थारू, जनजातिलगायतको मागलाई छलफल गरी सम्बोधन गर्न, पुनर्निर्माण अभियानलाई तीब्रता दिन राष्ट्रिय सहमतीय सरकार आवश्यकता रहेको बताए । ‘यसका निम्ति राजनैतिक पार्टीहरुबीच सकारात्मक छलफल भइरहेको छ, उनले भने, ‘अन्तर्राष्ट्रिय समुदायको समेत सकारात्मक सहयोगको निम्ति अपेक्षा गर्दछौं ।’
राजदूत ह्वाइटले अष्ट्रेलियन सरकारले नेपाल र नेपाली जनतालाई सहयोग गर्दै आइरहेको तथा पुनर्निमाणमा सहयोग गरिरहेको जानकारी गराए ।
