३ साउन, काठमाडौं । यातायात ब्यवस्था विभागले बिपी राजमार्गमा अनाधिकृत रुपमा सिन्धुलीका रुटमा चलिरहेका ठूला बसकाे रूट खारेज गर्न सुरू गरेको छ । पहिलो चरणमा विभागले मंगलबार ९ वटा बसको रुट पर्मिट खारेज गरेको छ ।
१८ सिटभन्दा बढीको बस चलाउन प्रतिवन्ध लगाइएको खुर्कोट-सिन्धुली खण्डमा चल्ने ठूला बसको रुट पर्मिट खारेज गरिएको हो । अनुगमनमा क्रममा ति बसलाई विभागले सोमबार नियन्त्रणमा लिएको थियो ।
काठमाडौं-खुर्कोट-घुर्मीको रुट लिएपनि सिन्धुली हुँदै विभिन्न गन्तब्यमा जाने बसको रुट पर्मिट खारेज गरिएको विभागका महानिर्देशक रुपनारायण भट्टराईले अनलाइनखबरलाई बताए ।
ना ६ ख ४५८८, बा ४ ख ३८९३, बा ३ ख ५९६४, बा४ ख २१४२, ना ६ ख ९१३, बा ४ ख ४३१२, ना ६ ख ८४६, ना ७ ख ८९२ र ना ५ ख ९५२६ नम्बरका बसको रुट पर्मिट खारेज गरिएको हो ।
खुर्कोट-सिन्धुली खण्डमा १८ सिटभन्दा बढीका सवारी सञ्चालन गर्न नपाइने नियम छ । तर, ४० सिटसम्मका बस पनि राजमार्गमा चलेको पाइएकाले ५ हजार जरिवाना लगाए ६ महिनाको लागि रुट खारेज गरिएको भट्टराईले बताए ।
यातायात ब्यवस्था विभागले पछिल्लो समयमा बिपी राजमार्गमा रातको समयमा सार्वजनिक सवारी चलाउन पनि रोक लगाएको छ ।
