कामना मासिकले सीजी इन्टरटेन्मेन्टसँगको सहकार्यमा गर्न लागेको सीजी कामना फिल्म अवार्ड २०७१ को लागि विभिन्न २६ विधामा मनोनयन सार्वजनिक गरेको छ । प्रत्येक विधामा ५/५ मनोनयन सूचि सार्वजनिक गरिएको हो । कामनाले २०७० साल वैशाख १ गतेदेखि चैत्र मसान्तसम्म सार्वजनिक प्रदर्शनमा आएका नेपाली फिल्महरुलाई सामेल गरि यसै वर्षबाट अवार्डको सुरुवात गर्न लागेको हो । जसमा  होस्टेल, महसुस, मोक्ष, नाई नभन्नु ल २ र मौनबीच तीव्र प्रतिस्पर्धा हुने देखिएको छ । होस्टेल र मोक्ष अवार्डको सर्वाधिक १८/१८ विधाको मनोनयनमा परेका छन् भने महसुस र नाई नभन्नु ल २ १७/१७ विधा तथा मौन १४ विधाको मनोनयनमा परेको छ ।
प्रतिस्पर्धामा रहेका २६ विधामध्ये दर्शकको चासो रहेका लोकपि्रय १८ विधामा एसएमएसमार्फत भोट गर्न सकिने आयोजकले जनाएको छ । दर्शकले चलचित्र, निर्देशक, अभिनेता, अभिनेत्री, खलपात्र, हाँस्य कलाकार, सह अभिनेता, सह अभिनेत्री, संगीतकार, गीतकार, पाश्र्व गायक, पाश्र्व गायिका, नव निर्देशक, नव अभिनेता, नव अभिनेत्री, बाल कलाकार, नृत्य निर्देशक र द्धन्द्ध निर्देशक विधामा आजबाट कात्तिक २५ गतेसम्म भोट गर्न सक्नेछन् ।
अवार्डलाई प्रतिस्पर्धाका आधारमा मुख्य अवार्ड,  प्राविधिक अवार्ड र अप्रतिस्पर्धी सम्मान, क्रिटिक्स एवम् जुरी अवार्ड गरी ५ भागमा विभाजन गरिएको छ ।  सिनेमा क्षेत्रमा नै जीवन बिताएका एक सिनेकर्मीलाई नगद एक लाखसहित लाइफ टाइम एचिभमेन्ट अवार्डबाट सम्मानित गरिनेछ । अवार्ड हुने मिति भने खुलाइएको छैन ।