४ माघ, रुपन्देही । अन्तरिम मन्त्रिपरिषदका पूर्वअध्यक्ष खिलराज रेग्मीले तोकिएको मितिमा नयाँ संविधान दिन दलहरु असफल भएको भन्दै यसबाट राष्ट्रिता कमजोर हुने बताएका छन् ।
संविधान र संविधानसभालाई दलहरुले सतही रुपमा लिएको भन्दै उनले सत्ताको खेलले माघ ८ मा संविधान जारी हुन नसकेको बताए ।
जेसीआई सिद्धार्थ नेपाल, रुपन्देहीको ४० औ पदस्थापन समारोहलाई आइतबार भैरहवामा सम्बोधन गर्दै रेग्मीले भने-‘जनताको मुटुको ढुकढुकीलाई मनन गरेर दलहरु अगाडी बढ्नुपर्नेमा त्यसो नगरी दलीय स्वार्थमा केन्दि्रत हुदा माघ ८ मा संविधान नआउने भयो ।’
दलहरुले देशलाई बिचबाटोमा ल्याएर छाड्न खोजेको भन्दै उनले भने, ‘के आफैले थपेको अवधीमा पनि संविधान दिन नसक्नु दुःखद होइन ? के सहिद र घाइतेले खोजेको यहि हो ?’
पूर्वप्रधानन्यायाधीश समेत रहेका रेग्मीले राजनीतिक दलहरुको सत्ताको खिचातानीले विधिको शासन र जवाफदेही निकाय कमजोर हुदै गएको धारणा राखे ।
