यो हप्ता स्विजरल्याण्डमा कम्तीमा पनि १७ सय वटा निजी हवाइजहाज अवतरण गर्दैछन् । हिमचुचुरोको सहर डाभोसमा ती जहाजहरुबाट विश्वका सयौँ अर्बपति, नेता, पत्रकार, सेलिब्रेटीहरु ओर्लिँदैछन् ।
सयौँ जहाज लिएर धनाढ्यहरु युरोपको स्वर्ग स्विजरल्याण्डमा एकसाथ भेला हुनुको मुख्य उद्धेश्य हो, विश्व आर्थिक मञ्च अर्थात् वल्र्ड इकोनोमिक फोरमको ४५ औँ बैठकमा भाग लिनु । जनबरी २१ मा सुरु भएको बैठक जनवरी २४ सम्म चल्नेछ ।
न्युजविकका अनुसार अबका ४ दिनसम्म स्विजरल्याण्डमा कैयौँ टन तौलका धनाढ्य तथा सेलिब्रेटीहरु विमानबाट ओर्लिनेछन् । यतिधेरै विमान अवतरण गर्ने भएपछि ड्याभोसको आकाशमा यो हप्ता पक्कैपनि ट्राफिक जाम हुनेछ ।
निजी हवाइजहाज मात्र होइन निजी हेलिकप्टरमा समेत धेरै पाहुनाहरु उडेर आउनेछन् । पोहोर सालको सम्मेलनका २५ सय सहभागीमध्ये २० प्रतिशत सहभागीहरु निजि हेलिकप्टरमा चढेर जुरिच विमानस्थलमा ओर्लिएका थिए ।
वल्र्ड इकोनोमिक फोरमको सम्मेलनमा माइक्रोसफ्टका संस्थापक बिल गेट्स, गुगलका इरिक स्कमिडिट, एलिबाबाका संस्थापक ज्याक मा, फेसबुकका सिओओ मार्क जुकरवर्ग, याहुकी सिइओ म्यारिसा मायर लगायतका प्रविधि जगतका हस्तीहरु सहभागि हुनेछन् ।
वल्र्ड इकोनोमिक फोरमको बैठकमा भाग लिनका लागि पाहुनाहरुले ७१ हजार डलर भन्दा बढि खर्च गरेका हुन्छन् । यतिधेरै खर्च गरिगरि यो बैठकमा भाग लिनुको मुख्य उद्धेश्य यसबाट दीर्घकालीन आर्थिक लाभ नै हो ।
यो बैठक यस्तो जमघट हो जहाँ विश्वका उद्योगी, व्यापारी, नेता, कलाकार, प्रविधि वैज्ञानिक सबै भेला हुन्छन् । उनीहरुबीच संजाल बन्नुका साथै महत्वपूर्ण व्यवसायिक सम्झौताहरु समेत सम्पन्न हुन्छन् ।
वास्तवमा वल्र्ड इकोनोमिक फोरमको यो बैठक विश्वका त्यस्ता १ प्रतिशत मानिसहरुको जमघट हो, जो सँग विश्वको कुल सम्पतिको ४८ प्रतिशत छ । अक्सफामका अनुसार विश्वका १ प्रतिशत धनाढ्यहरुले विश्वका कुल सम्पतिको ४८ प्रतिशत कब्जा गरेका छन् र अन्य ९९ प्रतिशत मानिसहरुसँग बाँकी जम्मा ५२ प्रतिशत सम्पति बाँडिएको छ ।
धनी र गरिबबीचको यो खाडल बढ्दै गएमा विश्वको जनसंख्याको १ प्रतिशत हिस्सा ओगट्ने धनाढ्यहरुको सम्पति विश्वका ९९ प्रतिशत मध्यमस्तरीय तथा गरीब मानिसहरुको कुल सम्पति भन्दा पनि बढि हुने अक्सफामले चेतावनी दिएको छ ।
