२०७१ फागुन ९ गते ११:०५ 
९ फागुन, काठमाडौं । विश्वकप क्रिकेटमा पाकिस्तानले वेष्ट इण्डिजसामू लज्जास्पद हार ब्यहोरेको छ । शनिबार भएको खेलमा वेष्टइण्डिजले पाकिस्तानलाई १५० रनले पराजित गरेको हो ।
वेष्टइण्डिजसँग अहिलेसम्मकै सबैभन्दा ठूलो हार व्यहोर्ने क्रममा पाकिस्तानले वन डे क्रिकेटकै खराव प्रर्दशनको कीर्तीमान बनाएको छ । यसअघि सन् २००६ मा जिम्माब्बेविरुद्धको खेलमा क्यानडाले ४ रन बनाउँदा चार विकेट गुमाएको थियो ।
वेष्ट इण्डिजले प्रस्तुत गरेको ३११ रनको लक्ष्य पछ्याएको पाकिस्तानले मात्र १ रन जोड्दा चार विकेट (नासिर जमशेद, युनुस खान, ह्यारिस सोहेल र अहमद शाहजानलार्इ) गुमायो ।
पहिलो ओभरमा दुई विकेट गुमाएको पाकिस्तानले तेस्रो र चौथो ओभरमा पनि विकेट गुमायो । त्यसपछि उसलार्इ खेलमा फर्कन कुनै चमत्कार भए मात्र सम्भव थियो ।
२५ रन जोड्दा ५ विकेट गुमाएको उसको पारी कप्तान सोहिब मक्सुद र उमर अकमलले सम्हाल्ने प्रयास गरे । सोहिब र उमरले छैटौं विकेटका लागि ८० रनको साझेदारी गरे । छैटौं विकेटका रुपमा सोहिब ५० रनमा आउट भए ।
साहिद अफ्रिदीसँग ३४ रनको साझेदारी गरेका उमर सातौं विकेटका रुपमा ५९ रनमा पभेलियन फर्किएपछि पाकिस्तानले फेरि तिब्र गतिमा विकेट गुमायो । उसले थप २१ रन जोड्दा ३८.६ ओभरमा अल आउट भयो । अफ्रिदी २८ रन बनाए ।
पाकिस्तानलार्इ सस्तैमा समेट्ने क्रममा जेरोम टेलर र आन्द्रे रसेलले समान ३/३ विकेट लिए ।
पाँच क्याच ड्रप
यसअघि क्राइस्ट चर्चमा पहिले ब्याटिङ गरेको वेष्टइण्डिजले दिनेश रामदीन र लिन्डल सिमोन्सको अर्धशतकको मदतमा ५० ओभरमा ६ विकेट गुमाएर ३१० रन बनाएको थियो ।
वेष्टइण्डिजले अन्तिम १० ओभरमा मात्र ११५ रन जोडेको थियो । आन्द्रे रुसेलले मात्र १२ बलमा तीन चौका र चार छक्काको मदतमा ४० रन बनाएका थिए ।
वेष्टइण्डिजका रामदीनले ५१ रन बनाए । ४३ बलको सामना गरेका उनले ७ चौका हानेका थिए । सिमोन्सले ४६ बलमा चार चौका र दुई छक्कको मदतमा ५० रन बनाए ।
डरेन ब्राभो ४९ रनमा रिटायर्ड हट भए भने मार्लोन श्यामुअलले ३८ रन जोडे । पाकिस्तानले पाँच क्याच छाडेको थियो, जसको वेष्टइण्डिजका ब्याट्सम्यानहरुले भरपुर फाइदा उठाए ।
विश्वकपमा पाकिस्तानको यो लगातार दोस्रो हार हो भने वेष्ट इण्डिजले पहिलो जित हात पारेको छ ।
प्रतिक्रिया 4